سنة أولى

من WikiBal6o

اذهب إلى: إبحار, بحث

محتويات

في البداية

  • أهلاً بيكم يا جماعة فى سنة أولى نورتوا طب عين شمس
  • التوهان و القلق و الخوف هم شعار اول السنة

بس بعد كدة لو استحملت شوية اضمنلك انك هتكون سعيد جدا

  • سنة اولي اول سنة بتحتك فيها بالكلية ،ادخل شوف الموضوع ده لو اول مرة تروح الكلية وعاوز تعرف حبة حاجات عنها: اول مرة تدخل الكلية
  • مينفعش تفضل لوحدك في الاول, لازم تسال ناس اكبر منك تاخد خبرتهم, كلم كل حد تلاقيه في وشك واسمعه متسمعش من حد واحد بس

لما تسمع اراء كتير هتعرف تكون لنفسك وجهة نظرك المستقلة و متبقاش ماشي على كلام حد واحد ممكن يكون مختلف عنك

الناس دول هتلاقي كتيير منهم في بلاطي و في الاستقبال و حتى اي حد تلاقيه قاعد جمبك في الكلية

  • مهم جدا انك تعرف انك مش لوحدك اللي تايهه في ناس كتيييير معاك تايهين برضو و ناس اكتر قبلكوا كانوا تايهين

التوهان ده هيقعد معاك شهر او شهرين ممكن اول ترم... اكتر من كدة تبقى بتهزر , لازم تعرف الدنيا ماشية ازاي بسرعة

و في نفس الوقت استمتع بحاياتك في الكلية الايام دي هي اكتر ايام هتفتكرها و تضحك على نفسك فيها و بجد هتكون ذكريات تحفة

مش لازم حد يحرقلك الفيلم كله حاول انت تكتشف حاجات بنفسك وتجرب هتلاقي الموضوع لذيذ قوي

  • كل شويه هتسمع حاجة غريبة كارنية فسيولوجي وتقسيم السكاشن و مجاميع و معاد كويز اول حاحة هتسال و اعرفها ازاي؟؟

هم في الكلية بيعلقوا ورق اعلانات لكل حاجة ,هتبقى ماشي تلاقي الورق في وشك متستعجلش وكمان اي اعلان بينزل هتلاقيه في قسم سنة أولى على بلاطى

  • هتلاقي كمان احساسك انك اصغر واحد هنا وان اي حد في الكلية اكبر منك... ولا يهمك انا عارف انها بتبقى مشكلة لانك كنت لسة في 3 ثانوي اكبر حد في المدرسة كلها, بس كونك اصغر منهم مش مشكلة المهم انك تتعلم كل حاجة عندك وتفهمها, اكيد هم يعرفوا اكتر منك لانهم هنا من قبلك ...المهم انك تكون عارف حاجاتك اللي بتاخدها و كل الناس هيعاملوك على انك اخ ليهم مش على انك صغير خالص والعبرة بدماغك مش بسنك
  • مشكلة سنة اولى انك تعرف نظام الكلية وتتعود عليه وتتكيف على نظام المذاكرة والشرح المختلف مفيش حد هيتابعك بتذاكر ولا لأ انت اللي هتابع نفسك

أنا عارف ان بلا منازع كلكم أوائل, بس أنا عايز انبهكم لحاجة مهمة جداً انهى احتفلاتك بسرعة

الموضوع خلاص انتهى على كده الثانوية مرحلة انتهت و الكلية لا تعترف بمجاميع الثانوية و لا مجهودك بتاع الثانوية لكن بتعترف بحاجة وحده بس و هو انك بتعملها ايه

  • اللي بيفرق في تقدير سنة اولي النقلة اللي بتعملها ما بين ثانوي وكلية والناس اللي بيعرفوا يعملوا النقلة دي بسرعة اكتر فرصتهم انهم يجيبوا تقدريات اكتر
  • لازم تعرف كويس جداً ان ميهمكش ابداً ممكن يقعد جنبك و احد جاب 100% فى الثانوية .... أهم حاجة من هيدي للكلية

و متعتبرش اني في الكلية خلاص مش لازم اذاكر لأ المذاكرة مهمة جدا زي ثانوية عامة ده لو مش اكتر كمان


سنة اولي فيها 4 مواد رئيسية و مادتين فرعيتين

  • المواد الكبيرة ينقسموا
    1. مادتين كبار خالص: Anatomy 1 , physiology 1 ودول عليهم معظم درجات السنة . كل واحدة 250
    2. ومادتين اصغر نسبيا: Histology 1 , biochemistry 1 حجمهم ودرجاتهم اقل . كل واحدة 150 درجة
  • مادتان فرعيتان :
  1. English
  2. حقوق الانسان

المحاضرات:

  • الدفعة هتتقسم 3 مجموعات أ ، ب ، ج
  • كل مجموعة هتاخد محاضراتها في وقت مخصوص ليها وبعديها المجموعة التانية وبعديها المجموعة التالتة وهكذا
  • بحيث المادة الواحدة محاضراتها هتتعاد 3 مرات
  • كل مجموعة ليها يوم اجازة في الاسبوع غير الجمعة طبعا
  • المحاضرات بتتشرح في المبنى الجديد اللى عند مسجد الزهراء
  • عدد الطلبة في المحاضرة هيبقى حوالي 400 ، بس متقلقش لان مش كل الناس بيحضروا المحاضرات زي ما هتلاحظ ( وده غلط تماما ) يعني هتلاقي العدد في المحاضرة نوعا ما مناسب ..
  • مهما كان لازم تحضر المحاضرات طالما مش بتاخد دروس و على فكرة المحاضرات بس كفاية طالما بتفهم
  • لما تسمع الكلام احسن مما تقراه بس لانك على الاقل حتى لو مفهمتش انت بقيت عارف مصطلحات لان غالبا الدكاترة بيشرحوا بالعربي في النص وكمان هتعرف النطق الصح للكلام
  • رؤساء الاقسام لما بيدخلوا دي محاضرة مهمة جدا غالبا هيجيبوها في الامتحان
  • رجاء متسمعش كلام اللي يقولك المحاضرات مش مهمة او اقرا انت في البيت او اسمعها متسجلة

الشرح و الدكتور قدامك والصور على البريزينتيشن بتفرق كتير

  • فى ناس منكم بتحب تسجل المحاضرات وبترفعها على بلاطى متعتمدش عليها بس إنت ممكن تستخدمها كوسيلة للمراجعة
  • نصيحة فى المحاضرة فى ناس بتسرح كتير ومش بتركز فى المحاضرة وغالبا بيكون على حسب الدكتور اللى بيشرح علشان متحسش انك ضيعت وقت على الفاضى حاول تعمل اى حاجة تخلى تركيزك ميتشتتش فى المحاضرة واحسن حل لده معاك ورقة وقلم وحاول تكتب معلومات ولو صغيرة عن اللى ان بتسمعه من الدكتور "حتى لو هتخرج من المحاضرة ترمى الورقة دى " ده بس عشان التركيز

السكاشن:

  • الفرق بين السيكشن والمحاضرة ان المحاضرة بيحضرها جروب الدفعة كله يعني حوالي 300 -400 طالب .. الطلبة بيتقسموا الى مجموعات أصغر في العدد وكل مجموعة صغيرة بتحضر سيكشن في فترة لوحدها
  • السكشن بيشرح فيه غالبا المعيدين وأحيانا الدكاترة وبيكون الشرح عبارة عن تأكيد للمعلومات اللي بتتقال في المحاضرة وزيادة بعض المعلومات العملية اللي مينفعش تتشرح في المحاضرة
  • سيكشن الهستولوجي عبارة عن محاضرة قصيرة جدا في المعمل بعدها كل طالب بيشوف الشرايح على المكرسكوبات بس سيكشن الاناتومي والبيو بيتقسم لجزأين :

- مدرج المشاهدة ودي بتبقى عبارة عن محاضرة مصغرة بيتناقش فيها المعيد أو الدكتور مع الطلبة في المعلومات اللي خدوها في المحاضرات - المعمل أو المشرحة وفيه الطلبة بيشتغلوا بأديهم ويشوفوا بعنيهم الجزء العملي في كل مادة وممكن مجموعة السكشن الواحد تتقسم لمجموعات أصغر زي اللي بيحصل في المشرحة بحيث تتاح الفرصة لكل طالب انه يشوف بعينه كل حاجة

  • كان فى السنة اللى فاتت نظام اول مرة يطبق فى الاناتومى وكان ناجح بكل المقاييس حاجة اسمها E-lap دى عبارة عن ايه بقا ؟ فى الاى لاب ده كل طالبين بيقعدوا على جهاز كمبيوتر بيبقى فيه شرح للجزء العملى اللى اخدتوه فى المحاضرة _بس على نضيف شوية _ ازاى ؟ هو عبارة عن فيديو اجنبى الشرح عليه بيبقى حلو جدا بيفهمكم احسن ... السنة دى مش عارفين ما زال قائم والا اتلغى
  • الدكاترة بياخدوا الغياب في السكاشن ولكل طالب نسبة غياب محددة لو تعداها بيتعرض لانقاص درجات أعمال السنة
  • مواعيد السكاشن منفصلة تماما عن مواعيد المحاضرات وبينزل جدول لكلاهما في أول السنة
  • أثناء السيكشن ممكن الدكاترة يعملوا امتحان مفاجئ عبارة عن كويز مش عليه أكتر من 5 درجات عشان كده لازم تكون مذاكر أول بأول و كمان ساعات بيعملوا كويزات مش عليها درجات أعمال سنة و بتبقى بس عشان تتابع و تختبر نفسك
  • حضور السكاشن مهم جدا بالذات لو مكنتش حضرت المحاضرة لأنه بيعتبر تأكيد عالمعلومات ومراجعة وكمان بتتدرب عالعملى

موقع الكلية

/http://telemed.shams.edu.eg/moodle1 الموقع ده بتاع الكلية نفسها هيديكوا username و password علشان تدخلوا عليه

  • كل مادة ليها قسم الدكاترة بيرفعوا علية البريزنتيشن اللي هم بيشرحوا عليها في المحاضرات
  • و في كمان منتدى forum تقدر تكتب فيه لو عندك سؤال للدكاترة بس مش مضمون انهم يردوا عليك D:
  • ممكن الدكاترة يحطولكوا عليه كويز مثلا علشان تعرفوا مستواكوا

مجموعات الشرح

  • في الاول خالص قبل الدراسة هتلاقي مجموعات بتعملها الاسر
  • دي مجموعات تطوعية من الاسر بتشرحلكوا اول كام درس كدة من كل مادة علشان تقلل التوهان
  • اكيد مش هيفضلوا يعملوها طول السنة هي بتبقى قبل الدراسة او اول شهر بالكتير
  • حضورها بيفيدك في انك تعرف كام كلمة بدري و تتخيل كل مادة هتمشي ازاي
  • في نفس الوقت عدم حضورها مش هيضرك قوي يعني..كل الحاجات دي الدكاترة هيشرحوها في المحاضرات
  • لو حضرت مجموعة شرح وخرجت مش فاهم كلمة..عاااادي جداا ااوعى تقلق او تخاف لان اللي بيشرح طالب زيك وانت لسة في الاول

استنى لما تاخدها تاني في المحاضرة غالبا هتفهم اكتر او ممكن تروح للي شرح يعيدلك بس مش مستاهلة قوي يعني

اعمل ايه في الأول

  1. هتحضر محاضرات أولى فى الكلية و ده اساسى علشان تعرف فكر رؤساء الأقسام و الدكاترة
  2. الكتب اللى هيقولوا عليها رؤساء الأقسام تجبها " السمع و الطاعة " لأن فى الغالب هى اللى هتذاكر منها من الآخر.

غالبا دلوقتي بقى في كتاب قسم لكل المواد وده هو اللي بيقولوا عليه

و هيقولوا في اول السنة أسامي مراجع كبيرة كدة أو text book متقلقش دي مش هتشتريها دي موجودة في المكتبة لو في نقطة مفهمتهاش او عاوز تعرف عنها أكتر لكن متتسرعش وتروح تشتريها لأن ملهاش لزمة دلوقتى خالص

اذاكر ازاى

  • تجاوز موضوع ان المصطلحات غريبة و مش قادر تترجم و كده كل ده كلام فاااارغ بمعنى الكلمة .....
  • في قاموس مصطلحات طبيه موجود في مكتبه المنار هتعتمد عليه لفترة بسيطه جدا وبعدين هتلاقي نفسك اتعودت عالمصطلحات من تكرارها لدرجه انك مش هتهتم تعرف المعني العربي ليها
  • الصعوبة في الترجمة ممكن تفضل معاك اول اسبوعين تلاتة وبعد كدا هتنسجم تماما مع اللغة الانجليزية ...
  • الموضوع من الاخر محتاج شوية وقت وحبة ذكاء في المذاكرة
  • يعني انت مش فاهم الكلام اللي مكتوب بالانجليزي واللاتيني ما تنشفش دماغك بقى وتقول الله مش سايب كلمة الا لما اترجمها وتقعد سايب الدنيا وفاتح القاموس وبتشوف كلمة كلمة لا كدة مش هاتنجز وغالبا هاتقعد تذاكر اليوم كله في صفحة واحدة
  • انت تكبر دماغك شوية ترجم حبة كلام وتستنتج الباقى .. و مادام معنى الجملة الإجمالي وصل خلاص مفيش داعي للتدقيق في التفاصيل ف الأول

والمهم حاول تمشي في المنهج يعني تقرا في الكتاب او الملزمة اللي هتذاكر منها وتمشي حبة صفح فيها

علشان في سنة اولي غالبا الفصل الاول بيكون كله كلام بيتقال تاني بقية المنهج وبتفهم بعد كدة مع الشرح يعني في حاجات مش هاتعرف تفهمها غير لما توصل لنهاية الChapter وهكذا

  • حاول تركز شوية في الكلام بتاع المحاضرة او السيكشن وحاول تلقط منه اي حاجة معلش الموضوع بيبقى صعب في الاول بس علشان التعود
  • مفيد برضو انك تستخدم قاموس انجليزي انجليزي لو هترتاح معاه هيكون احسنلك كتير و هيخلي التأقلم مع اللغة أسرع
  • الموقع ده هايفيدكم جدا للترجمة بدل ما تجيبوا قاموس وبعدين ترموه
  1. http://www.hyperdictionary.com/medical
  1. http://medical-dictionary.thefreedictionary.com/

وانت بتذاكر مش المهم انك تحفظ حاجة بالكلمة زي ثانوية عامة احسن طريقة تفهمها وتحفظها حفظ بسيط ( مش نصي )

  • حاول على الاقل انك كل يوم تروح تقرى مجرد قراية مش مذاكرة اللي انت خدته النهاردة في الاول هتلاقيك بتقول اقرى صفحتين!!

اه معلش اقراهم... شوية و هيسرعوا و يشرحوا كتير لو انت متعود هتعرف تتابع معاهم .. و متنساش ان صفحتين دول مبيبقوش حاجة قليلة في الأول لأنك أصلا مش متعود و محتاج تترجم و كده .. على الاقل ممكن تجمع حاجات مادة معينة و تقراها يوم الخميس و الجمعة لكن متراكمش من اسبوع للاسبوع التاني هتلاقي عندك حاجات كتير وهم لسة شغالين و متبقاش عارف تعمل ايه.. و لا عارف تتابع مع المحاضرات

  • كدة تقدر تجيب امتياز

المجموع

المجموع من 800

  • الامتياز من 85%
  • جيد جدا من 75%
  • جيد من 65%
  • مقبول 60%
  • ضعيف من 30% الي 60%
  • ضعيف جدا اقل من 30%

في حالتين ضعيف وضعيف جدا يعتبر الطالب راسبا

  • يمنح الطلاب الناجحين بتقدير امتياز مكافئة ومقدارها 120 جنيه
  • يمنح الطلاب الناجحين بتقدير جيد جدا مكافئة ومقدارها 84 جنيه

Physiology 1

  • physiology 1 ده علم وظائف الاعضاء شبه الأحياء كده بتاعت الثانوية بس بدون لا اميبا و حشرة ذبابة فاكهة و لا الحاجات دي كلها.
  • بيشرحلك كل جهاز في جسم الانسان بيشتغل ازاي.
  • اكتر مادة هتحسسك انك دكتور بجد علشان هتفهم فيها اوي.
  • الماده حجمها كبير و معلوماتها كتير .

علشان تعرف تفاصيل كل العناوين اللي تحت افتح دي Physiology 1


  • السيناريو الدراسي

اكبر مادة هتعيشوا فيه و نصيحة هى حلوة و شيقة.... بس و حياتك متغرقش فيها فى مواد تانية مهمة برد هى عليها 250 بس معلش برده تعرف تجيب درجات فيه بإذن الله

  • القسم
  • توزيع الدرجات و الإمتحانات
  • الكتب ومصادر الدراسة
  • المناهج-chapters
  • العملى
  • الدروس
  • المذاكرة
  • المحاضرات
  • البحث
  • مقدمة بسيطة في منهج الفسيولوجي

Anatomy 1

Anatomy 1 , تشريح او تركيب الجسم .. مش هتاخد وظيفة الاعضاء .. هتاخد تركيب الاعضاء .. وعلاقتها ببعضيتها ايه

علشان تعرف تفاصيل كل العناوين اللي تحت افتح دي Anatomy 1

  • القسم
  • توزيع الدرجات و الامتحانات
  • الكتب ومصادر الدراسة
  • Chapters
  • المحاضرات
  • العملي / sections
  • الدروس
  • المذاكرة
  • السيناريو الدراسي
  • مقدمة بسيطو في منهج الاناتومي

Histology 1

Histology 1 يعني علم الأنسجة و الخلية وحدة الجسم بتاعت ثانوي

علشان تعرف تفاصيل كل العناوين اللي تحت افتح دي Histology 1

  • القسم
  • توزيع الدرجات
  • الكتب ومصادر الدراسة
  • المناهج /chapters
  • المحاضرات
  • العملي
  • الدروس
  • المذاكرة
  • مقدمة بسيطة في الهستولوجي

Biochemistry 1

biochemistry 1 او الكيمياء الحيوية هي المادة التانية فى مواد الوظيفة Function بعد الفسيولوجى وبيو اولى زى ما يكون مجرد تعريفات للمركبات اللى جوه الجسم ... بتتكون من ايه وبتتصنع ازاى وخواصها ايه ... عشان لما تدخل تانية تبقى مؤهل انك تدرس طريقة عملها فى الجسم وازاى بيعملها metabolism عشان يقدر يستفيد منها

علشان تعرف تفاصيل كل العناوين اللي تحت افتح دي Biochemistry 1

  • القسم
  • توزيع الدرجات
  • الكتب ومصادر الدراسة
  • المناهج-chapters
  • المحاضرات
  • العملي
  • الدروس
  • المذاكرة

Computer

  • تم الغاء مادة Computer بدايه من العام الجامعي 2008-2009
  • و تقرر عدم منح درجه بكالريوس الطب والجراحه من جامعه عين شمس الا بعد تقديم مايثبت اجتياز الطالب للرخصه الدولي لقياده الكمبيوتر ICDL او مايقابلها من الشهادات الاخري

English

في المنهج اللي بيشرحوا د . عبد الله وهو دكتور من كلية ألسن

هدفة يعرفك الفرق بين معاني الكلماات اللي بتكون شبه بعض في العربي و استخدام كل واحدة

و كمان يأهلك لامتحان التوفل

الكورس بيتاخد في 6 محاضرات كحد أدنى

غالبا بيبدا الترم التاني و بينزل اعلان عن معاد المحاضرات

له كتابين واحد لل American English والتاني لل British English

  • الكتاب الازرق بتاع American English فيه قطع عليها اسئلة mcq و اسئلة mcq على الجرامر والكلمات و اسئلة كدة جملة بيحط اربع خطوط تحت كلمات و المفروض انك تعرف انهي فيهم اللي غلط
  • الكتاب الاخضر بتاع British English في انواع اسئلة كتير غالبا مش بيجي منه حاجة
  • الاجابات موجودة في الكتاب
  • المحاضرات بتكون عبارة عن ان الدكتور بيحل معاكوا و يقعد يقول كلمات كتيير الكلمات دي ليكوا لكن مش بتمتحنوا فيها
  • الامتحان بيجي نصا من الكتاب و هو في المحاضرات الاخيرة بيحدد المهم و يجي منه بالنص متشغلش بالك قوي يعني
  • مهم ان الناس تحضر لانه ميصحش يلاقي المدرج فاضي و لو ادايق ممكن ميقولش على الحاجات المهمة D;

حقوق الانسان:

بتبدا الترم التاني غالبا بتكون تلات او اربع محاضرات للدفعة كلها في نفس الوقت

المحاضرة مدتها ساعة

المحاضرات لذيذة جدا و مسليه جدا و بتبقى مليانة كلام مفيد ليك كانسان كتيير برا كلام الملزمة

  • بتاخد فيها الحقوق العامة للانسان و حقوق الطفل وحقوق المريض و حقوق الطالب
  • في ملزمة ليها في أوسكار و في نسختين واحدة عربي و التانية انجليزي
  • بتحل في الامتحان باللغة اللي تريحك "عربي او انجليزي"
  • مبتتضافش للمجموع بس فيها نجاج و سقوط
  • بس مبتشلهاش للدور التاني ولا تعيد السنة علشاناها لو منجحتش فيها _لا قدر الله_ هتتطلع هي معاك سنة تانية

ولو برضو لاقدر الله منجحتش فيها تطلع معاك تالتة وهكذا لحد متنجح فيها

أدوات شخصية