سنة تالتة

من WikiBal6o

اذهب إلى: إبحار, بحث

محتويات

introduction

سنة تالتة دايماً بيتقال إنها من أصعب سنين الكلية ، إن لم تكن أصعبهم على الإطلاق . سنة تالتة مش سنة مستحيلة زي ما بيتقال .مشكلة سنة تالتة بس الوقت قليل والكمية كتير في ناس كتييير وقعت بسبب تالتة وناس كتيير اترفعت بسبب تالتة

فى معظم الحالات الدروس مهمة ، بس بطبيعة الحال مفيش قواعد .. كل واحد ليه اللى يناسبه أهم حاجة فيها هي تنظيم الوقت ، بحيث تستفيد من الدروس وتعرف تذاكر أول بأول مهم جدا إنك تسمع >> تفهم >> تذاكر أول بأول >> تراجع كويس أكتر من مرة >> تراجع كويس آخر السنة

نصائح مهمة للي داخلين تالتة

يفضل تقرأ الكلام المكتوب تحت كل مادة قبل ما تقرأ النصائح دي

نصائح عامة

أولا: خليك قريب من ربنا وحافظ على عباداتك واعرفه في الرخاء حتى يعرفك في الشدة


ثانيا: أوعى تقول لنفسك كل شوية تالتة صعبة ، تالتة مجزرة ، مفيش فايدة ... إلخ

كل ده تفكير سلبي وبيحبط الواحد مهما عمل ، خليك متفائل وامشي من الأول بتركيز على قد ما تقدر لغاية الآخر بنفس التركيز وهتحصل كويس (يمكن اعلى من أولى وتانية كمان).


ثالثا: استغل كل لحظة في اليوم ، يعني ساعتين بين المحاضرات والسكاشن حرام تضيع أو ساعة قبل ما تنزل الكلية تضيعها ليه ؟ صدقني الساعات دي بتساعد قوي قوي قوي


رابعا: حاول تكافئ نفسك لما تخلص كمية كويسة من المذاكرة (ده بيساعد في استرداد عافيتك).


خامسا: (مهمة قوي قوي قوي) هتلاقي امتحانات كتيرة في السكاشن ، اوعى تضيع الاسبوع كله وتمسك المادة وتقول اصل عليا امتحان الاسبوع الجاي والامتحان كله من خمس درجات وهتلاقي اللي مذاكرش جايب 3 ونص ، وبعدين تلاقي الاسبوع اللي بعده امتحان تاني لمادة تانية تمسكه هو كمان علشان تقفله هو كمان وفجأة تلاقي نفسك متأخر اسبوعين عن مذاكرة كل المواد (نظري وعملي) وابقى دور على الوقت بقى اللي هتذاكر فيه اللي فاتك ، القطر بيمشي بسرعة قوي !!!

كفاية قوي قبل الامتحان بيومين تركز فيه قوي على المادة علشان الامتحان وتحضر السكشن وتمتحن وهتلاقي نفسك قفلته بإذن الله .


سادسا: محدش يتعب نفسه ويبص في مراجع ولا text books ولا غيره

أولا مفيش وقت ، ثانيا فيها كلام كتير قووووووووووووووووووووووووووووووووي غير مطلوب مننا وهيتعب الواحد ويشتته على الفاضي

يعني اللي كان بيبص في جايتن في الفسيولوجي أو grey's في الأناتومي يكبر دماغه خالص من الكلام ده في سنة تالتة للأسباب السابقة

لكن لو حد ضميره هيأنبه يبقى يبص على الصور بس والكلمتين اللي تحتها وخلاص (يادوب للتوضيح) لكن غير كده يستحسن الواحد يكبر دماغه

غير كده كتاب القسم نفسه تيكست بوك للي عاوز يستزيد

ملحوظة: هتلاقي رؤساء الاقسام هيدخلوا أول محاضرة يقولوا على المراجع اللي الواحد ممكن يشوفها ويطلع عليها ......... ملهوش لزمة الكلام ده ، كله علشان الجودة فقط لا اكثر

حتى لو قالوا ان مفيش كتاب قسم تلتزموا بيه أو حاجة زي كده فده كلام علشان الجودة مش أكتر لكن لو بصينا فعلا هنلاقي الآتي:

الباثولوجي: اللي عمل الكتاب رثيسة القسم نفسها ودايما بتقول أنا حطيته في الكتاب وأنا كاتباه وأنا مش عارف إيه وكده يعني ........وطالما هي رئيسة القسم يبقى حاطة في كتابها اللي في دماغها وبالتالي هنلاقي الكتاب كفاية قوي ... إلا لو اتغيرت مثلا فلازم نعرف دماغ الرئيس الجديد لو نزل كتاب جديد كان بها ويبقى هييجي منه الامتحان حتى لو قال متعتمدوش عليه لأنه بيبقى كاتب اللي في دماغه في كتابه ان شاء الله ومفيش حاجة هتخرج عنه (غير كده كتاب القسم كبير بما فيه الكفاية وفيه حاجات مش مشروحة أصلا ولا موجود عنها حرف في ورق الدروس ، يعني وافي وكافي ان شاء الله)


الفارما: صعب قوي يطلع برة الكتاب لأنه وبكل بساطة الادوية بتختلف من وقت للتاني ومن مكان للتاني فالكتاب مختصر على الآخر (يعني لازم تعرف اللي فيه ومتلخصهوش لأنه متلخص جاهز وورق الدكتور علاء يشهد بكده لأنه هو هو الكتاب بالنص إلا اللهم تجميعات أو حاجة زي كده بس) وغير كده الدكاترة وهم بيشرحوا بيشرحوا الكتاب بالنص وبيقولوا لو مش موجود في الكتاب يبقى مش مهم أو طالما زودوه السنة دي يبقى مهم ... وهكذا لكن المراجع هتبقى موسعة قوي وبالتفاصيل اللي هترعب الواحد وتخليه يكره الفارما


المايكرو: كتاب القسم كاتب كل حاجة صحيح لكن الامتحان جه مخادع ، صحيح من الكتاب لكن مخادع ومن السهل الممتنع .. فلو واحد شاف ان كتاب القسم مش مساعده والورق مختصر زيادة عن اللزوم ممكن يستعين بمرجع مايكرو (لكن لايفضل بالنسبالي) لو فيه حاجة مش مفهومة في الكتاب يبقى يا تتحفظ زي ما هي يا تسأل فيها دكتور يقولهالك .. لكن مرجع هيلغبطك لأن فيه تقسيمات غير اللي في المنهج عندنا واسما بكتيريات غير اللي عندنا وكده يعني .......


البارا: أي كتاب ينزله القسم يبقى هو بالنص منه لأن البارا أصلا مش محتاجة حاجة ومحدش هيلاقيس مراجع بارا أصلا إلا ما ندر ومش مطلوب مننا حاجة أصلا الكتاب واضح وكافي وكل حاجة فيه سهلة ان شاء الله ...........هي بس مشكلتها مع كتر الحاجة ممكن تدخل في بعض لكن كل جزء بيبقى مفهوم على حدة ان شاء الله

الملخص: رئيس القسم هو اللي بينزل الكتاب (تحت اشرافه على الأقل) وهو اللي بيحط الامتحان ومفيش رئيس قسم مش بينزل كتاب (بتوع تالتة يعني) مش عارف بخصوص البارا لأن رئيسة القسم اتغيرت لكن غالبا كل حاجة زي ما هي ومحدش هيقول متذاكروش من كتابي بإذن الله



نصائح خاصة لكل مادة

طبعا بالإضافة إلى النصائح العامة اللي فوق اللي تدخل تحت كل مادة

الباثولوجي

أولا: ركز من أول السنة كويس قوي علشان أول جزء في المادة هو الأساس بتاع المادة كلها طول السنة.


ثانيا: لو كنت من اللي بيحضروا محاضرات السنتين اللي فاتوا ، اوعى تقرر السنة دي انك تبطل مرة واحدة وتسمع تسجيلات لمجرد انك مش فاهم حاجة ، لأ حاول انك تفهم واستحمل ولو معرفتش يبقى يا تسمع التسجيل بتاع الشابتر وتستنى لما الدكتور اللي بيشرح يمشي وييجي غيره وهتلاقيه بيفهم كويس ان شاء الله ، لكن متبطلش مرة واحدة

لكن لو كنت من بتوع الدروس أصلا ومش فارقة معاك محاضرات ،مفيش مشاكل (بس ركز في الدرس كويس !!!)


ثالثا: متذاكرش من كذا مصدر ، تمسكلي شابتر من الكتاب وشابتر تاني من ورق الدكتور جمال وشابتر تالت من ورق الدكتور عبد العليم وهكذا

غلط غلط ، توهان على الفاضي من غير أي داعي ، انت من أول السنة شوف الكتاب والورق واللي يعجبك امشي عليه طول السنة (ممكن تغيير المصدر بين الجنيرال والسيستيمك مفيش مشاكل) .


رابعا: لو من بتوع سماع التسجيلات ممكن متحضرش محاضرات ولا تاخد درس ، بس تمشي بنفس ورق الدكتور وبنفس السرعة متخليش حصص تتراكم عليك (هتندم بعدين لو تراكمت حاجة).


خامسا: في آخر السنة لو لقيت ناس بتتكلم عن مواضيع انت مسمعتش عنها أصلا وعمال يقولوا هي داخلة ولا لأ ؟ طيب اتشرحت ولا لأ ..... إلخ ، كبر دماغك خالص

الورق اللي ذاكرت منه طول السنة كامل (والناقص في الورق وموجود في الكتاب فده إما مش مشروح أو مش بييجي في الامتحانات لكن هو محطوط في الكتاب فقط علشان يكون مرجع لأي حد)، لا تقلق أبدا ومتذاكرش غير اللي في الورق بس .



الفارما

أولا: أهم الشباتر هم أول شباتر وخصوصا أول اتنين (الجنيرال ، والأوتونوميك) دول هيمشوا معاك طول السنة في باقي الشباتر ، فركز في الأول علشان ترتاح في الآخر


ثانيا: زي ما الدكتور علاء بيقول "مذاكرة الفارما مرتين بكروتة ، احسن بكتير من مذاكرة مرة واحدة بتركيز" وهتبقى تعرف السبب .

علشان كده التكرار ثم التكرار ثم التكرار ... ثم التكرار .


ثالثا: بيشرحوا في السكاشن حاجات نظري ومش بتتشرح تاني في المحاضرات فخلي بالك .


رابعا: الورق هو نفسه الكتاب ، أي مصدر هو نفس الكلام أهم حاجة متحاولش تلخص الكتاب لأنه متلخص جاهز ، لو عاوز تعمل حاجة علشان تحس انك ذاكرت اعمل تجميعات .



المايكرو

أولا: هتلاقي نفسك مكبر دماغك منها خالص ومركز على الفارما والباثولوجي وده اكبر غلط ، المادة ارخم ما يمكن وصعبة لو تراكمت وللأسف محدش هياخد باله من كده ولا حد هيسمع الكلام وهتلاقي نفسك مزنوق في الآخر ... فحاول نسمع الكلام من الأول وتديها حقها كويس.


ثانيا: ارخم سكشن تقابله في حياتك هو سكشن المايكرو ، هتلاقي اللي داخل على الفيس بوك من الموبايل واللي نايم واللي بيكتب حاجة .... إلخ . فياريت تأقلم نفسك عليه انه كده (معلش استحمل انت في عين شمس + تالتة + مايكرو !!! )


ثالثا: لو عاوز تغير المصدر اللي بتذاكر منه مفيش مشاكل لكن مش في نفس الشابتر الواحد. لكن يستحسن تذاكر من الكتاب لأن بعض ام سي كيوهات واسئلة الامتحان بيجيب منه وممكن متلاقيش الاجابة في ورق الدروس


رابعا: متسيبش المادة لقبل الامتحان وتذاكرها لأنك مهما عملت مش هتلحق تخلصها لو مش متذاكرة قبل كده.



البارا

أولا: برضه هتلاقي نفسك مكبر دماغك منها خااالص (وعندك حق على فكرة) ، مفيهاش مشاكل لو استنيت لما الشابتر كله يخلص وبعدين تسمع تسجيلات الدكتور أيمن مثلا ومعاك ورقه وتلم الشابتر كله وتمتحن امتحان السكشن بتاعه وتقفله وانت مطمن على الآآآآآآخر ان شاء الله ، بس مشكلتها انك بتراكم عليك وبتضطر تسمع حصص كتير في وقت قليل فلو لقيت نفسك مش هتلحق تسمع يبقى تمشي من الأول ومتستناش لما الشابتر يخلص .


ثانيا: الكتاب سهل وواضح وسلس ان شاء الله فذاكر منه إلا لو كنت بتاخد درس فيستحسن تذاكر من ورق الدكتور وهتلاقيه نفس الكتاب من غير تغيير ان شاء الله .


Pathology - علم الأمراض

و علشان تعرف عن الباثولوجي روح Pathology هتعرف عن

  • القسم
  • رئيس القسم
  • توزيع الدرجات المناهج
  • العملي
  • إمتحانات السكاشن
  • الدروس

pharmacology - علم الأدوية

روح pharmacology علشان تعرف تفاصيل أكتر عن كل العناوين اللي تحت دي

  • القسم
  • رئيس القسم
  • توزيع الدرجات
  • المنهج /chapters
  • المحاضرات
  • العملي والسكاشن


1) سكاشن العملى العادية

2) سكاشن الـE-learning

  • الدروس و الكتب ومصادر المذاكرة
  • المذاكرة
  • الامتحانات


Bacteriology - علم البكتيريا

مادة ذات طبيعة مختلفة حجمها كبير .. قريب من حجم الباثولوجي تقريباً درجاتها مش قليلة ومش كتيرة بس بتتعامل كانها مادة صغيرة ، وهي مش كده هتحس من اول السنة انها ملهاش وقت فهتتركن ودا اكبر غلط ف ماتستهونش بيها

من الناحية العلمية البحتة .. هى و الباثو أهم مادتين عندك السنة ، ده با لنسبة للمادة العلمية و إحتياجك ليها فى السنين اللى جاية ..

روح Bacteriology علشان تعرف تفاصيل أكتر عن كل العناوين اللي تحت دي

القسم

  • رئيس القسم
  • توزيع الدرجات
  • Branches
  • المحاضرات
  • السكاشن
  • الدروس
  • مصادر المذاكرة
  • الامتحانات
  • نظام امتحان المايكرو العملي


Parasitology - علم الطفيليات

مادة خفيفة خالص و مسلية وصغيرة في الحجم تعتبر ابسط مادة فى سنة تالتة من المواد القليلة فى الكلية اللى ممكن تتقفل .. تتقفل فعلاً بس متستقلش بيها برده ، لان من الملاحظ انها بتفرق مع اوائل الدفعات


البارا لو ذاكرتها مع ال 4 امتحانات اللي طول السنة دول هتجيب فيها تقدير وانتا مستريح هيا مادة صغيرة جدا بس اهم حاجة متتركنش ، وتذاكر الشابتر اول ما يخلص

اعتمد فى مذاكرتها على التجميعات ذاكر المنهج بالعرض ، مش كل دودة لوحدها ، عشان هتنسي و تتلخبط فى الاخر

بتتكلم عن الطفيليات عامة ... ديدان و حشرات و وحيدات الخلايا

روح Parasitology علشان تعرف تفاصيل أكتر عن كل العناوين اللي تحت دي

  • المنهج
  • توزيع الدرجات
  • العملي
  • الدروس
  • مصدر المذاكرة

قسم سنة تالتة على بلاطي

لو عندك أي استفسار عام أو بخصوس أي مادة تقدر تدخل هناك وتشارك وتسأل وتضيف اللي انت عاوزه وهتلاقي اللي يجيب طلبك بإذن الله

قسم سنة تالتة على بلاطي


بالتوفيق للجميع يارب ونتمنى انها تكون سنة سعيدة عليكم ان شاء الله .

أدوات شخصية