سنة رابعة

من WikiBal6o

اذهب إلى: إبحار, بحث

محتويات

سنه رابعه

رابعة جميلة يا جماعة ، رابعة سنة مختلفة ، أكتر سنة ممكن يضيع منك يها درجات وانت مش واخد بالك وأكتر سنة ممكن تاخد منها درجات ...

البداية : رابعة أولى سنوات الدراسة الاكلينيكية في الكلية ، ده مش معناه ان النظام هيتغير أو ان طريقة التعامل مع المواد والمعلومات هتتغير بس هيا محتاجة تعديلات.

في رابعة أربع مواد :

  1. الرمد ( طب العيون)
  2. الانف والأذن والحنجرة (ENT)
  3. طب المجتمع والصناعات
  4. الطب الشرعي والسموم



هبدأ بالكلام العام عن نظام السنة وبعدين ناخد كل مادة حته حته ونفصصها .. تقسم الدفعة إلى أربعة أرباع ، ويقسم وقت السنة إلى أربعة أرباع كل ربع حوالي شهرين ، في كل شهرين من دول هتخلصوا مادة كاملة من الألف إلى الياء يعنى العملى و النظرى بتوع كل ماده حيخلصوا فى شهرين ، ويتم تبادل الدراسة بالأقسام بين المجموعات الأربعة. طبعاً النظام ده بيبقى ظالم لبعض المجموعات اللي مثلاً بتاخد المواد المبحبحة في أول السنة وبعدين تاخد المواد المزنوقة في آخر السنة ، تخيل مثلاً إن لآخر راوند عندك يبقى امتحان النظري بعده بعشرة أيام ، لكن المقلب ده يمكن تلافيه بالتخطيط من أول السنة للمواقف دي .




رابعة من السنين اللي المواد فيها ممكن تتقفل ، تتقفل يعني تتقفل ، زي الثانوية العامة ، لو عرفت الحاجات اللي بتوقع الدرجات وحاولت تلافيها من الأول ، وخصوصاً الحاجات اللي انت مش هتاخد بالك منها إلا في آخر السنة ، ممكن تبقى أحسن سنة في حياتك الدراسية من حيث التحصيل والدرجات ، وده مش بمجهود خرافي زي بتاع تالتة ، لأ بشوية إلتزام صغيرين ، مشكلة رابعة إنها خادعة جداً ، ممكن تظهر في الأول بالمنظر ده لأن بيبقى فيه حالة عدم اهتمام من الطلبة و الدكاترة والأقسام وتأخر بداية الدروس والطبيعة المختلفة للمواد الاكلينيكية ( الرمد والأنف والأذن ) والطبيعة الاخري للمواد الباقيه ( الكوميونيتي والشرعي)، في رابعة مادتين لازم نركز عليهم بعد كده لإنهم السبب الأساسي للرسوب وتضييع الدرجات في رابعة ، مادة الكوميونيتي و مادة التوكسيكولوجي ( علم السموم ) .


المحاضرات

  • محاضرات الرمد : يومياً من يوم الأحد للأربعاء من الساعه 8-9 صباحاً

بمدرج 3 بمبنى الأقسام - المبني الجديد - ( كل مجموعة على حدة ) و دي مش علي مدار الراوند بيجمعوهم و يتاخدوا كلهم فنهاية الراوند .

  • محاضرات الانف والاذن  : يومياً من يوم الأحد للخميس من الساعة 1-3 عصراً

بمدرج 3 بمبنى الأقسام - المبني الجديد -( كل مجموعة على حدة )

  • محاضرات الشرعي : يومياً من يوم الأحد للخميس من الساعه 8-10 صباحا و من الساعه 1-3 ظهرا

بمدرج 2 بمبنى الأقسام - المبني الجديد -( كل مجموعة على حدة )

  • محاضرات طب المجتمع : يومياً من يوم الأحد للخميس من الساعة 9-12 ظهرا

تدرس بالمدرج الخاص بالقسم

  • كل قسم له 40 يوم متكاملين للانتهاء من المقرر نهائيا عمليا ونظريا مع الانتهاء من امتحان أعمال السنة

( إمتحان نهاية الراوند )

ده كان كلام عايم عن سنة رابعة بس هنتبعه بكلام مفصل عن كل مادة بعد كده .


Ophthalmology - الرمد

أقل المواد اللي ممكن تقابلك فيها مشاكل في رابعة

سامعكم بتقولوا ازاي ؟؟ عشان الاتفاق العام على إن الناس تاخد فيها درس أو مجموعة ,طبعاً تقدر ذاكر رمد من غير درس ,

لو عاوز تعرف اكتر عن النظام ادخل هنا نظام روند الرمد 2011-2012

توزيع الدرجات

الدرجة الكلية: 250 درجة

65 درجة بتبقى خلال الراوند مقسمين إلى :

  • 20 درجة بحث
  • 30 problem solving
  • 15 عملى

و

125 درجة نظرى اخر السنة مقسمين إلى :

  • 55 درجة short essay & cases
  • 70 درجة MCQ

و

  • 20 درجة فى اخر السنة للشفوى

و

  • 40 درجة امتحان slides فى آخر السنة برضه

قسم الرمد:

قسم الرمد من أكثر الأقسام احتراماً في الكلية .

هتلاحظ ده فى الرقى فى تعامل الدكاترة , و تمكنهم من المادة بشكل مبهر


مكان القسم كالآتي

هتدخل باب المستشفى اللي بيوصل لاستقبال الباطنة ، اللي هو قدام المبنى اللي اتبنى جديد (مبنى تطوير التعليم) وتحتيه وحدة المطافي , اطلع السلم بتاع المبنى اللي ع اليمين ، واطلع الدور الرابع ،أو فيه أسانسير للرمد فى نهاية الممر اللى على الشمال , ومرحباً بك في قسم الرمد


صورة:Common 1 copy.jpg

صورة:2common 2 copy.jpg

صورة:3 common 3 copy.jpg

صورة:4common 4 copy.jpg

صورة:Batna 1.jpg

صورة:Batna 2.jpg

صورة:Batna 3.jpg

صورة:Batna 4.jpg

صورة:Batna 5.jpg

صورة:Batna 6.JPG


  • فى ناس هتاخد الراوند بتاعها فى العيادات الخارجيه , بتدخلها من باب صغير على الشمال بعد باب المستشفى الرئيسى على طول .

صورة:3yadat 1.jpg

صورة:3yadat 2.jpg

صورة:3yadat 3.jpg

صورة:3yadat 4.JPG

صورة:3yadat 5.JPG



محاضرات الرمد :

  • المحاضرات بتتاخد على مدار 10 ايام، 5 ايام فى الاسبوع و دة بيبقى فى الايام الاخيرة من كل راوند

=

-المحاضرة بتكون الساعة 8 ولمدة ساعة واحدة

مش زى المحاضرات التقليدية اللى بتشرح مواضيع معينة موجودة فى الكتاب , لا... بتبقى عبارة عن تجميعات ، يعني مثلاً فيه محاضرة اسمها طب عيون الأطفال ، ومحاضرة تانية اسمها تأثير السكر على العين ، ومحاضرة انخفاض الابصار . الاقبال على المحاضرات ضعيف ، بس ده مش لأنها ضعيفة ولا حاجة ، ده لأن معظم الناس بتاخد دروس أو مجموعة , ولأنها بتبدأ بدري ، بتكون فى المبنى الجديد ، وما فيهاش غياب ، وممكن تختار محاضرات معينة بس تحضرها.

-المحاضرات دي معظمها مفيد جدا على فكرة.

-هتلاقى المحاضرات مجمعة فى أوسكار أو هنا و ممكن تلاقى ناس من اللى بتحضر المحاضرات فى دفعتك كاتبينها و منزلين النسخة الجديدة .

-يُقال إن المحاضرات دى بييجى منها سؤال أو اتنين فى امتحان النظرى آخر السنة .. لكن هذه المعلومة لم تؤكد حتى الآن :D



راوندات الرمد:

الرمد متقسم الى وحدات ، كل وحدة متسمية بإسم دكتور ، والطلبة هتتقسم على الوحدات دي على حسب أرقامهم . مسئولية الوحدات دي انها تشرح النظري ، و تفرجك وتشرحلك كل السلايدز ، وتوريك حالات ، وده مش اللي دايماً بيحصل ! كل وحدة فيها مجموعة من الدكاترة والمدرسين والنواب ، والوحدات دي بتتفاوت في التزامها ومستوى الدكاترة ، حضور الراوند مهم جداً ،لأن حضور الدرس لوحده مش كافي انك تفهم كويس ، و الراوند شغال خمس ايام فالاسبوع يعني عندك جمعه وسبت هم بس اللي اجازه ,ده غير طبعاً ان الغياب بيتحاسب عليه بشده لأن أكتر من 10 مرات غياب بحرمان من إمتحان الراوند والجميل انك ممكن تظبط غيابك في راوندك وتروح تحضر في وحدة تانية أحسن ، لأن اللي بياخد الغياب نائب صغير، وغالباً بيكونوا لُطاف , و عايشين على أرض الواقع معاك :D

قبل الراوند ما يبدأ هات الحاجات الآتية :

  1. اسطوانة ال slides و دي مش موجوده السنه دي لكن ممكن تحملها من هنا [1] و ممكن يجيلك في الامتحان صور غير اللي انت شفتها .
  2. كتاب العملي بتاع د .سعد رشاد ، وده فيه الصور القديمة ( عددها 200 ) وتحتهم كل الأسئلة اللي ممكن تيجي عليهم واجابتها .وده مهم جدا جدا وهيفيدكوا أوى فى حل الاسئله اللى على السلايدات و ده ممكن تحمله من هنا [2].

بعد كل راوند فيه امتحان من 30 درجه بيكون cases عليها mcq أو سؤال نظري ( diagnosis , treatment , complications , ... etc) بس مجرد mention يعني بدون تفاصيل طبيعة الأسئلة و وجود صورة من عدمها حسب الدكتور اللى هيحط الامتحان بالنسبة لأول راوند هيه مشكلة كبيرة ، عشان لازم المنهج كله بالعملي والنظري يكون متذاكر خلال أول 40 يوم وخلصان خالص ، ومشكلة لآخر راوند لأنه هييجي لهم في وقت مزنوق جداً جداً مستوى الامتحان والدرجات بيتفاوت من راوند لراوند ، لأن كل امتحان بتحطه وحدة معينة بالتناوب . المهم , مذاكرته بتكون غالباً من كتاب د/سعد العملى برضه .

Clinical skills

مطلوب منك فيها:

1- visual acuuty measurment


2-ant. segment investigation " lens& iris&conjunctiva "


3-pupil examination


4-confrantation field of vision


5-examination of extra ocular muscles


6-how to put eye drops in eye&how to make an eye patch


الكتب :

  1. كتاب القسم ،و انت غير مطالب بمعلومة زيادة عن اللى فيه .
  2. كتب الـ ام سي كيو بتاع القسم ، كتابين, واحد أبيض و ممكن تحمله من هنا [3] و واحد أزرق و ممكن تحمله من هنا [4], أو بمعنى آخر ..الكتاب الابيض -و هو المهم-، حاول تحله قبل امتحان الراوند (و لازم لازم تحله قبل إمتحان آخر السنة بيجي منه بالنص كتير ) .

3- كتاب The Simplest of Ophthalmology وده كان اول سنه ينزل السنه دي معمول بنظام مختلف عن كتاب القسم قائم عالمقارنات وفيه معظم الزيادات اللي بيزودها دكتور الكفراوي وناس كتير جربته وشكرت فيه

  1. كتاب د. مأمون ، وده كويس ، وأحلى حاجة فيه الرسومات اللي بتفهم لأن كتاب القسم عنده نقص شديد في الرسومات ، بس نصيحة شخصية من مؤلف الكتاب ، ذاكر من كتاب القسم .
  2. مجموعة كتب لدكاترة آخرين ، بس طبعاً ينطبق عليها ما قد قيل عن الكتاب السابق ذكره .
  3. ورق دروس ، قليل جداً و ما بأنصحش بيه ، ومش متداول بين الطلبة ،ممكن تستعينوا بورق دكتور حسين سويلم (مبينزلوش إلا قبل الإمتحانات بحاجة بسيطة,و غير متوفر ) لو علشان الشفوى لأن فيه تجميعات حلوه .
  4. أطلس العملي ممكن متحتجهوش خالص بس ده لو انت عايز.



الدروس:

1/ مجموعة د. الكفراوي ، وهو أستاذ قدير وشخصية مش هتشوفها كتير في الكلية ولا خارجها ، مجموعته كانت ممتعة جداً جداً، وبالحجز ، يعني ، لما الدراسة تبدأ ، على طول احجز في المجموعة ، ميزتها انها ارخص ، كانت 710جنيه في السنة بس ,و بعد ما بقى العميد شرح لكل الدفعه ببلاش كانت في مدرج المحلاوي ، وخلص تقريبا معظم الحاجات االمهمه عندنا في الرمد , كانت يومين فالاسبوع اتنين واربع من الساعه 3 للساعه 5 ، هو مش بيركز ع الامتحان قد ما بيركز على المادة ، هيخليك أستاذ في الرمد ، هتفهم كويس ، بس الاستعداد للامتحان عايز مجهود اكبر.ممكن تنزل محاضرات د الكفراوي من بلاطي من د.الكفراوي للسنوات السابقة :تسجيلات"نظري-عملي-داتا شوا , رقم د/ كفراوى : 0105459004

2/ درس د. حسين سويلم ، اللي بياخدوا معاه بيشكروا فيه كتير ، وما لوش ورق غير شوية تجميعات وورق للشفوي ، وتفاصيل الفلوس الدرس 950 فى vip و 1100 باين فى حسبو , بالاضافة طبعاً ان حصص العملى لوحدها رقم د/ حسين : 01006077215

3/ فيه دكاترة تانيين بيدوا دروس لعدد محدود من الطلبة زى د/ تامر بدران و د/ محمود حنفى .

-- طبعاً درس من غير مذاكرة يعني تضييع وقت ، ذاكر اول باول في كل الاحوال .




مشكلة راوند الرمد اللي بياخدوا مجموعة إن يومهم غالباً بيبقى كالآتي

  • من 8 : 9 ص : محاضرة فى اخر 10 ايام من الراوند
  • ومن 9 : 1 ص  : راوند
  • ومن 3 : 5 ع : مجموعة رمد د/كفراوى لو بتاخد معاه

وبعدها ترجع البيت ، قدامك وقت صغير جداً عشان تخلص اللي أخدته النهارده ، ده لو كان فيك لسه نفس ! بس كله هيعدي


ENT - الانف والاذن والحنجرة

من أكتر المواد اللي الناس بتقابل فيها مشاكل كتير في رابعة ، برغم سهولتها النسبية عن باقي مواد رابعة وصغرها، إلا انها بتتهمل على حساب مواد تانية ، أنا بأعتبرها مادة لذيذة و ممتعه توزيع الدرجات ( حسب نظام السنة دي وقابل للتعديل )

  1. امتحان نهاية الراوند ب 60 درجه( 40 درجة عملى slides و أسئلة عليها ) + ( 20 درجة امتحان OSCE )

الـ OSCE دة عبارة عن امتحان على patients بتاخد منهم history أو بتعمل examination و عليه شويه أسئلة زى شفوى بس حاجات سهلة جدا إدخلوا هنا [5] هيساعدكو جدا فالـ OSCE

  1. امتحان آخر السنة النظري 120 درجة MCQ لا يوجد تحريري ... و دي صعوبة الإمتحان
  2. امتحان الشفوى 20 درجه ( لجنه واحده )




قسم الENT

القسم يتوه شوية ، موجود في كذا حتة ، المكان الرئيسي إنك تخش من باب مستشفى الجراحة ، وتمشي على طول لحد ما تعدي بوابة تانية ، تدخل شمال وتطلع السلم ، القسم و السكرتارية قاعة د. السماع في آلدور التاني ، وغرف العمليات في الدور التالت .

أما العيادة ، بعد ما تخش من بوابة مستشفى الجراحة ، قبل ما تدخل على تاني بوابة ، هتدخل يمين ، و بعدين شمال , هتلاقى المرضى واقفين قدام الباب عشان يدخلوا العيادة .


صورة:Gera7a 1.jpg

صورة:Gera7a 2.jpg

صورة:Gera7a 3.jpg

صورة:Gera7a 4.jpg

صورة:Gera7a 5.jpg


محاضرات الENT:

المحاضرات بتتاخد على مدار الراوند وبتخلص المنهج كله في 40 يوم من الأحد للخميس في مدرج 3 بالمبني الجديد من 1 : 3 ظ المشكلة فيها ان الدكاترة مستواهم متفاوت جداً , وبيتقال فيها كم معلومات كبير ، عشان كده استعد دائماً لتزويد المعلومات أياً كان المصدر اللي هتذاكر منه ، والحضور فيها بيبقى معقول نتيجة ان عدد أقل من الناس بتاخد فيها دروس ، وطبعاً مفيش مجموعات ، نصيحة ، فيه دكاترة سمعتهم قوية جداً بإن محاضراتهم كويسة ، ، لو كنت مش ناوي تحضر المحاضرات ، على الأقل إعرف مواعيد محاضراتهم من الجدول وإحضرها


راوندات ال ENT:

الراوند بتاعك هتاخده على مدار الشهرين ، المجموعة بتتقسم A , B كل مجموعة ليها بتنزل 3 أيام سبت و اتنين و أربع أو حد و تلات و خميس ،الراوند بيبدأ الساعة 9 و بيخلص على 11 , فلو بتحضر المحاضرات هيكون قدامك ساعتين بريك بيختلف الراوند ده عن راوند الرمد إن النظري مبيتشرحش تاني ، عشان كده ممكن يبقى عندك مشكلة كبيرة في نظري الأنف والأذن لو مبتاخدش درس فيه ، ومبتحضرش محاضراته ، اللي بيتشرح في الراوند هنا هو كذا موضوع نظري مع السلايدز بتاعتهم ومناقشات فيهم وخلاص ، مشكلته إنه يعتبر تطبيق على النظري ، بس في نفس الوقت ممكن ما تبقاش لسه أخدت المحاضرة النظري بتاعت الموضوع اللي بيتشرح ، فبتبقى قاعد مش فاهم حاجه خااااااااااالص

الراوند بيتاخد في 3 أماكن :

  1. مدرج 1 و 2 فى القسم
  2. مدرج 3 بالكلية اللى بتاخد فيه محاضرات ال ENT
  3. وحدة السمع , و دى هتحضر فيها راوند واحد هو الphoniatrics , و مكانها انك بتكمل بعد ما تدخل مكان قسم ال ENT بدل ما تطلع السلم

هتلاقيها قدامك

  • الراوند من أول السنه دي 2011-2012 طبقوا الغياب والموضوع فيه حزم شديد ياريت تلتزم بالحضور جدا لإن اللي نسبة غيابهم تعدت الغياب المسموح بيه نزلوا نبطشيات فالأجازة .


  • أنا بأنصح إنك تحضر الراوندات كلها ، والمراجعة اللي بتتعمل في آخر الراوند لازم تحضرها ، وممكن تحضرها كذا مرة في الراوندات اللي بعد كده ، لأن الدكاترة اللي بيدوا الدروس بيقسموا العملي على حصص كتير طويلة وغالية
  • في آخر الرواند ( بيبقى فيه امتحان 40 درجة ) MCQ مشكلته ان بيبقى في تفوات واضح في مستوى الإمتحانات ما بين راوند والتاني

يعني ممكن راوند يجيب كله 40 وراوند محدش يعرف يجيب 40

امتحان الراوند :

العملي ب 60 درجة تنقسم إلي :

1.slides 20 marks

-nose -ear -pharynx -larynx

2. xray and ct scan 8 marks

3.phoniatrics 4 marks

4.instruments 2 marks

5.audiogram and tympanogram 8 marks

نظام الامتحان ان الصور بتتعرض على البروجيكتور او الداتا شو وانت تكتب في ورقتين الاجابة حسب ما تشوف و ده بيبقى سهل ان شاء الله


الكتب :

  1. كتاب القسم ، الكتاب نزل بجزئين vol1 , vol2

- ملحوظة: الكتاب يحتوي ع 2 SHEETS عشان امتحان الي في آخر الراوند و نظامه و توزيع درجاته بيكون إزاى , بس متشتريش الكتاب مخصوص علشان الشيت ده لإنهم بيوزعوه في امتحان الراوند غير ان فيه كتاب ب 25 جنيه نزل يحتوي ع ال cases بتاعت ال ent كلها...

  1. ورق د. عمرو جودة ، أكتر ورق شبه كامل ، وفي زيادات عن أي مصدر آخر
  2. ورق د.محمد سعد , مكتوب بخط الإيد زي ورق د/أيمن بيو .. و المعلومات فيه بتتعرض بالعرض مع بعضيها .. على صورة مقارنات يعني .
  3. كتاب د. نبيل ربيع شيك ومنظم ، بس مشكلته انه ناقصه شوية حاجات ، هتزودها من المحاضرات ، ومشكلته التانية ان الرسومات التوضيحية والصور قليلة جداً في الكتاب ، لإنه حاططها على سي دي .
  4. كتب أخرى ، منها كتاب أزرق من جامعة القاهرة ، فيه شوية صور ملونين ، مشكلته انه مختصر أكتر من نبيل ربيع كمان. و فى كمان كتاب دكتور محمد فريد يعتبر كامل و ميزته ان كل صفحة قدامها الرسومات التوضيحية بتاعتها
  5. كتب ال MCQ ضرورية جدا و ياريت تبدأ تتدرب على الحل , ميبقاش قبل الإمتحان بس

بافتراض إنك هتحضر كل المحاضرات ، لازم تبص على الكتب والورق الأول ، وتحدد على ضوء المعلومات السابقة المصدر اللي هتذاكر منه ، وتزود عليه المعلومات الصغيرة اللي هتتقال ، لإن الامتحان آخر السنة كله ام سي كيو .



كتب العملي :

  1. ورق عمرو جوده و ده موجود هنا [6]
  2. أطلس د. سعد و ده موجود هنا [7]
  3. CD دكتور نبيل ربيع (لازم تذاكره قبل إمتحان الراوند) لأنه أكتر حاجة شاملة فى العملى هتلاقيها

بس ما تكتفيش بالصور اللي معاهم ولازم تبص على صور كتير هتلاقيها على سيديهات ، نصيحة ، هات ورق العملي قبل الراوند ، عشان تتابع معاه


فيه موضوعين في النظري بيتاخدوا كاملا في العملي هما :

  • Phoniatrics التخاطب
  • Hearing tests



دروس ENT:

  1. د. عمرو جودة ، ، ومواعيده الى حد كبير مظبوطة ، بيهرج بس على خفيف ، الحصة كلها بتبقى جد من أولها لآخرها ، وممكن دي تبقى ميزة عند بعض الناس ، في آخر السنة ، بيعمل 10 حصص كبار كل حصة 3 أو 4 ساعات ، بيراجع فيهم المنهج أو بمعنى آخر بيشرح فيهم 80 % من المنهج تاني ، مع حل الMCQ و ال cases المهمة ، بس للأسف في آخر السنة كل حاجة بتبقى مزنوقة ، فمن الممكن انك تختار بعض الحصص وتنفض للباقي .

دكتور عمرو بيدي الدرس مرة واحده على مدار السنة ..ممكن تحمل مراجعات د عمرو جودة من على بلاطي من هنا [8]

  1. د.محمد سعد ، شخصيه ظريفه ودمه خفيف ، ، بس ميزته انه بيدي أقل قدر ممكن من المعلومات وبيحفظ الناس في الحصة، ، وزي أي دكتور فيه ناس بيجيبوا درجات وحشة وناس بيطلعوا من الاوائل معاه. ميزته إنك لو قررت تاخد درس على نص السنه هتلاقيه بيبدأ مجموعه جديده بيشرح فيها المنهج كله من الاول
  2. دكاترة تانيين مش معروفين قوي منهم د / إيهاب مثلاً.
  3. ممكن ببساطة شديدة ما تاخدش درس في المادة دي ، بس بشرط إنك تحضر معظم المحاضرات ، وتبدأ مذاكرة المادة دي من أول السنة ، هي مادة صغيرة ومش متعبة أوي ، وفي آخر السنة بعد ما تكون خلصت المنهج ممكن تاخد بعض أو كل حصص المراجعة اللي انا اتكلمت عنها .



الامتحانات :

المشكلة ان الMCQ اللي جابوه في الامتحانات كان أصعب من أي MCQ شفناه ، واللي شفناه أصلاً بيخض ، فعشان كده ، أصعب كتاب MCQ لقيته لينا كان كتاب د. عبد الحميد ، الكتاب ده ميزته انه هيدربك على أسلوب الMCQ الصعب و ده موجود هنا [9] ، فيه كمان كتاب د. حسن وهبة ,الام سي كيو بتاعه مستواه معقول لو مش عايز تنتحر عباره عن 1000 ام سي كيو وده اللي جه منه امتحان السنه دي 2011-2012 حوالي 70-75% من الاسئله بالنص و ده موجود هنا [10] و فيه ورق دكتور محمد سعد ( كان الأكثر شهرة و صيتا حتى تحطمت الأسطورة على حظنا , و عرفنا ده فى الإمتحان ! :D ) , و ده معناه إنك تذاكر كويس , و تحل كتير كمان

طبعاً زي ما انتم عارفين ان حل الام سي كيو دي مهارة في حد ذاتها ، ممكن متكونش عارف المعلومة وتجيب الاجابة الصح

  • ملحوظة : في الرمد تفاصيل العمليات الجراحية غير مطلوبة ، أما في الأنف والأذن فهي من أهم أجزاء المنهج .

طب المجتمع - community:

أسهل مادة السنة دي من حيث طبيعة المعلومات ، وأصعبها من حيث الحفظ ، لإنها سهلة وكبيرة جداً جداً والصفحات مليانة إلى حد يخنق ، كإنك مثلاً بتحفظ في ورق جرايد، بس هي من المواد اللي لازم ترجع لها في شغلك كطبيب مهما كان تخصصك ومهما كان المكان اللي انت هتشتغل فيه .

بشكل عام باخد فيها الحاجات المتعلقة بالمجتمع ومشاكله الصحية .

عندك جزئين part1& part 2


Part1 و ده فيه :

   General epidemiology
   ( الأمرااض المعدية ) Communicable diseases
   ( الخدمات الصحية ) Health services
   ( بيتكلم فيها عن مخاطر العمل ) Occupational health

و Part2 وده فيه :

   Non_communicable diseases
   Nutrition
   Health education & communication & Behavioral problems
   Environental Health
   Hospital administration
   Traveler's health


-- بارت 1 هو الأساس اللي بيكزوا عليه طول الراوند واللي بيجي منه إمتحان أخر الراوند مع العملي

-- بارت 2 بيتشرح مره واحده أو مرتين في السنه وأهميته كلها أخر السنه مش أيام الراوند خالص يعتبر اسهل واخف جدا في مذاكرته عن بارت 1 لكن تكمن مشكلته إنه بيتركن لاخر السنه وتبص تلاقي نفسك فتره الامتحان بـ تقرأه لأول مره




المذاكرة:

بالنسبة للمذاكرة بقى وأذاكر إزاي فالكميونيتي مفيهوش صور ولا باور بوينت ولا فيديوهات ولا أي حاجة من دي خالص .. تعتبر أكبر مادة من حيث الدرجات في رابعة (300 درجة) ، وأكتر مادة الناس بتنقص فيها نتيجة طبيعة المعلومات ، سهولتها الشديدة ووجود الأسلوب الأدبي بجانب الأسلوب العلمي ، و كميتها وعدم وضوح الأجزاء المهمة زي باقي المواد وطبيعة الامتحان وليس صعوبته ، بتيجي بعض الأسئلة في حتت سهلة بس مش متوقعة أو مستخبية ، وكل سؤال عليه عدد أكبر من الدرجات . محتاجة تتذاكر copy & paste علشان في الامتحان بيبقوا عايزين كلام محدد مش المعنى .

المذاكرة كالآتي:

كتاب أو ورق + محاضرات + مذاكرة وحفظ

كتاب أو ورق + درس + مذاكرة وحفظ

كتاب أو ورق + سماع تسجيلات + مذاكرة وحفظ


تسمع مين ؟؟؟

اللي يريحك ( إسمع دكتور أشرف وإسمع دكتور سيد العقدة وإسمع دكتور إيهاب واللي ترتاحله امشي تبع ورقه أو الكتاب )

لو مش عاوز تشتري الكتاب مش مشكلة .. الورق كفاية

مفيش مراجع ولا حاجات تساعد ولا أي حاجة ..مادة نظري بحتة تماما



الدرجات

300 درجة: 100 أعمال سنة ( نهاية الراوند ) - 200 آخر السنة

100 تنقسم كالآتي:

  1. 60 إم سي كيو على النظري الكتاب الأولاني + كتاب العملي
  2. 10 درجات OSPE وهو إمتحان على كتاب العملي + كتاب التمارين + اجزاء بسيطة جدااااا من النظري
  3. 30 درجة على البحث + الامتحانات + الانشطة + 3 درجات منهم غياب في المحاضرات

200 تنقسم كالآتي:

  1. 170 درجة إمتحان اخر السنة essay 80--mcq 90
  2. 30 درجة إمتحان شفوي على لجنتين



قسم الكوميونيتي

معظم الدكاترة في القسم ده قريبين جداً من الطلبة ، أو بيحاولوا يعملوا ده ، لأن أصلاً شغلتهم انهم يبقوا قريبين من الناس .

مكان القسم:

عارفين صالة الامتحانات ؟؟؟ في الجنينة اللي هناك دي هتلاقوا في الوش باب كده مكتوب عليه قسم طب المجتمع والصناعات والبيئة .... الدور التاني بقى (كأنكم طالعين ناحية قسم البايو كده الناحية التانية) نفس مكان مدرج البايو هتلاقوا مدرج الكميونيتي ) والراوندات ممكن تبقى في المدرج أو في الدور التالت فوق .



المحاضرات:

ممكن يبقوا 2 أو ممكن يبقوا 3 محاضرات البريك بينهم بيبقى 5 دقايق

بتبدأ الساعة 9 صباحا والغياب بيتاخد لحد الساعة 10

وبتخلص الساعة 11 أو 12 على حسب ..

الجدول بتاع محاضرات الاسبوع بينزل كل أسبوع .. و بينزلوا ليكو كمان جدول بالـ Assesments بتاعت أعمال السنة هما بيكونوا 3 إمتحانات بياخدوا منهم أعلي درجتين .


الكتب :

  1. كتاب القسم ، السنة دي كان متقسم جزئين كل جزء حوالي 250 صفحة مكتوبين بفونت صغير جداً زي بتاع الجرايد ، طبعاً ده اللي انت مطالب بيه في النظري والMCQ ، بس انت مطالب بمعرفة معلومات أكثر للشفوي ، وهما بيحاولوا إنهم يطوروه باستمرار ، وأحيانا ً بيلغوا أجزاء منه ، بس ما تتكلش على كده ، ذاكر كله مفيش حاجة بتخسر.
  2. ورق د / هاني ، يمكن استخدامه كدليل للمنهج أو مساعد في الأجزاء اللي مش واضحة أو مكتوبة بطريقة متخلفة في كتاب القسم ، بس لا يغني عن كتاب القسم.
  3. ورق د / أشرف : ميزته إنه مختصر ومتنظم عن الكتاب بس علشان تجيب درجات منه لازم تسمعه زى اسمك .
  4. ورق د / إيهاب : هو شبيه جدا بكتاب القسم بس مختصر عنه لكنه مش مختصر أوي و منظم جدا جدا - تقريبا كامل -
  5. كتاب الMCQs بتاع القسم (مهم جداً جداً لأن بييجي فيه نسبة من الMCQ بالنص)



الدروس:

1-د.اشرف : هيحفظك كميونيتي جزء جزء لو أخدت معاه من أول السنة .. هيسهل عليك المذاكرة بعد كده

2- د.سيد العقدة : هو بيعتمد أكتر على انه يحاول يفهمك المادة مش حفظ و خلاص و رقمه : 01005240050

3- د.ايهاب : شرحه مختصر بس بينجز معاك وورقه حلو جدا جدا

4- د.هاني الحناوي : رقمه : 01223138697



العملي

عملي الكميونيتي بينقسم كذا قسم هاشرحهم بالتفصيل دلوقتي بس قبل كل حاجة لازم نعرف كتب العملي فيه 3 كتب عملي ( بـ 40 جنيه فقط ):

كتاب العملي نفسه الشرح اللي فيه المواضيع(Practical Handout):

وده علشان العملي وفيه جزء متكرر في النظري برضه يعني يعتبر كلام نظري وتبع النظري وفيه شوية حاجات عملي .


كتاب التمارين(Exercise Book) :

ده فيه تمارين تبع كتاب العملي (اسئلة - جداول - مسائل - حسابات - ... إلخ) وده الدكتور بيحله معاكم في الراوند نفسه (رخم حبتين بس مهم) .


كتاب الـ ( Log Book) :

وده الكتاب اللي بنحل فيه اللي عملناه في الزيارات + بنحل فيه امتحان الـ OSPE وبنسلمه بعد الامتحان .


مكان الراوند:

بيختلف على حسب مزاج الدكتور المسؤول ، ممكن في مكتبه وممكن في المدرج وممكن في الجنينة وممكن في أي مكان ......... بالنسبة لميعاد الراوند بيبقى يومين فى الأسبوع .. حد وتلات أو اتنين وأربع



المطلوب في العملي

أولا: البحث

مطلوب منك تعمل بحث بس مش زي قبل كده بحث كوبي بيست وخلاص ، لأ بنعمل بحث زي ما بيعملوه بتوع الماجستير والدكتوراه مثلا


باجيب فكرة أو سؤال عاوز اوصل لإجابته وبعدين باقدم بروتوكول للكلية علشان يوافقولي على اجراء البحث - وبعدين باعمل خطوات البحث نفسه وباوصل للنتايج وبس

انا هاشرح المطلوب على شكل مثال عن اللي عملته علشان يبقى اسهل:

الدكتور هيقولكم بعد التقسيمات والذي منه على ان مطلوب من كل مجموعة انها تجيب فكرة أو سؤال يتحط كعنوان للبحث احنا قالنا هاتوا كام فكرة كده وانا هاختار الفكرة الانسب واخترنا (Hand/wrist Musculoskeletal disorders among Ain Shams medical students)

مطلوب نعمل بقى بروتوكول:

وده عبارة عن شرح مبسط للفكرة وانا هاعمل إيه وازاي وعلى مين علشان اقنع الكلية انها توافقلي على اجراء البحث


وده بيتكون من:

Title : وده اللي قلناه فوق

Introduction : ودي فيها شرح مبسط للفكرة واهميتها في المجتمع وخطرها وكده يعني (لا تتجاوز صفحتين يعني )

Objectives : ودي اهداف البحث بتاعي .. يعني عاوز اوصل لإيه

Methodology : وده هاشرح فيه انا هاعمل البحث ازاي

يعني هاعمل البحث والدراسة على طلبة الطب سنة رابعة مثلاونوعها كذا وهاخد عينة منهم بالطريقة الفلانية وهاوزع عليهم استبيان يملوه وبعدين هادخل البيانات على الكمبيوتر وهاوصل للنتايج المطلوبة

Refrences : هاكتب المراجع اللي جبت منها المقدمة بتاعتي .



الدكتور هيعدل لو محتاج تعديل ولو كله تمام هيقول طيب ابدؤوا بقى تصمموا الاستبيان اللي هتوزعوه على الطلبة

وده بيبقى بقواعد وهتاخدوها في العملي فمفيهوش مشكلة ان شاء الله

لما الدكتور يوافق عليه خلاص .... هيقولكم بقى هتوزعوه على مين وكام شخص وكده يعني


بحثي كان توزيعه على طلبة سنة رابعة بنسبة متساوية ذكور واناث وكان العدد كله 200 (100 ذكور و100 اناث)

ونبدأ نوزعه والطلبة يملوا البيانات وكده يعني لغاية ما يكتمل العدد ...... كده يبقى تمام جدا



فاضل ندخل البيانات على الكمبيوتر ونعمل البحث نفسه


البحث بقى مكون من الآتي:

Title: وهو نفس عنوان البروتوكول جاهز

Abstract: ده تلخيص البحث بتاعي .. المفروض اعمله اخر حاجة بس بيتكتب في الأول

باكتب فيه نبذة عن الموضوع والهدف منه وعملته ازاي ووصلت لإيه وده بشرط لا يتجاوز براجراف واحد فقط

Introduction: ودي هي نفسها بتاعة البروتوكول

Objectives: ودي نفسها بتاعة البروتوكول

Literature Review: وده عبارة عن تلخيص لكام بحث قبل كده بنفس الفكرة تقريبا

كل بحث ألخصه في براجراف صغير اكتب فيه اسم الباحث وعنوان البحث وعمل البحث ازاي ووصل لإيه (يعني نختار حوالي من 5 إلى 10 ابحاث سابقة كده)

Methodology: وده عبارة عن نفس اللي عملناه في البروتوكول بس بتغييرات بسيطة (هاضيف عدد الاشخاص اللي عملت عليهم البحث مثلا وكده يعني)

Results: ودي بقى الجديدة معملتهاش قبل كده

البيانات اللي وصلتلي هادخلها في الكمبيوتر باستخدام برنامج الاكسل ومنه على برنامج اسمه: SPSS أو على برنامج الـ SPSS نفسه .... وهو بيعملي الجداول والنسب والرسومات البيانية والمقارنات وكل حاجة ، هاحط الجداول بقى والنتايج اللي طلعتلها في البحث في الجزء ده

Discussion: وده بقى هاعبر عن الجداول بكلام عادي وادخل فيه وصلت لإيه وكده يعني

Conclusion: وده بقى براجراف صغير هاكتب فيه بعد ما وصلنا للنتايج دي ووجدنا ان كذا بياثر على كذا إذن لابد من كذا كذا كذا علشان نحسن المجتمع ونرتقي بيه لمستوى افضل

Refrences: نفس المراجع اللي كتبتهم في البروتوكول .


وبكده يكون البحث خلص وكله تمام الحمد لله.

ثانيا: Health Education واختصاره HE

ده عبارة عن ملف باوربوينت أو بوستر أو لوحة أو مطوية فيها حاجات متعلقة بالصحة العامة والتثقيف الصحي

سواء للامهات أو الاطفال أو الدكاترة أو الطلاب أو أي فئة في المجتمع لكن بخصوص تثقيفهم صحيا

الحاجات دي زي اللي بتتعلق في مراكز الصحة العامة أو في المستشفيات أو حتى في الكلية

يعني مثلا عن الحصبة - التهاب الكبدي الوبائي - التطعيم - الرضاعة الطبيعية - .... إلخ


مطلوب مني إني أعمل يا باوربوينت يا بوستر يا بروشور عن أي موضوع أختاره وأطلع أشرحه للطلبة في يوم معين تحت إشراف دكاترة كبار

الدكتور قالنا إعملوا اللي عاوزينه فأنا عملت باوربوينت في نفس الموضوع بتاعنا بس عن طريقة الاستخدام الامثل للكمبيوتر علشان أتفادى الوقوع في مخاطر ومشاكل صحية


وشرحناه في يوم معين وخلاص ............




forensic & toxicology - الشرعي والسموم

المادة بتنقسم لكتابين كتاب طب شرعي بيتكلم عن الجروح والجرائم واثارها في الجسم والحاجات دي وكتاب سموم وهو شبه الفارما كده بس بيتكلم بس عن المواد السامة وبيركز على صورة التسمم وعلاجها

القسم

قسم السموم في مستشفي السموم وانت ماشي علي طول فوت تمريض وأسنان هو بعديهم باب أسود بـ إزاز

اما الشرعي فده في المبني الجديد في الدور الأول

أما بقي رئيس القسم راجل مزاجه عالي , من الناس الي ليهم هيبه ، أما بقي المتحف فده في الدور المينس تحت الأرض وهو ميتخيرش عن متحف الباثولوجي بس ده هيجبلك عينه ويقولك قولي سنه ونوعه وأسمه وعنوانه ومين ضربه وليه وكان واقف فين ومات من إيه ويكون مضروب أدامك عشر غزات بمطاوي وفي الأخر مات مخنوق يا راجل من الأخر هيتظبط زي متحف الباثو هيتحفظ يعني



الدرجات:

الماده كلها من 200 درجه

إمتحان الراوند من 80

  • 40 درجات عملي ( صور علي الداتا شو وعليها اسئله بسيطه تشمل صورمثلا للشرعي ويسال عن نوع الاصابه أو الآله المسببه أو سبب الوفاه وتشمل كتابه تقرير وملء شهاده وفاه كلها حاجات هتتدربوا عليها فالـ skills اللي ليها مواعيدها طول الراوند )

وعن نظام الراوند http://www.bala6y.org/vb/showthread.php?t=46776 هيفيد جدا

  • 10 بحث
  • 20 إم سي كيو علي الكتابين بالكامل :D
  • 10 درجات لـ خمس امتحانات assessment تمتحنوهم طول الرواند كل اسبوع غالبا

اخر السنه 120:

  • 20 درجة شفوي على لجنين لجنه توكسو ولجنه شرعي
  • 100 نظري مقسم الي:

25 case شرعي و 25 case toxo و 25 short essay شرعى و25 للـ toxo بس التقسيمه ممكن تتغير عادي



المحاضرات

المحاضرات ملهاش مواعيد ثابته متوزعين فى الجدول حسب الأرقام

وفى كمان فى الجدول معمل وsmall group و problem orientation .


الكتب

  1. في كتاب القسم .. أكيد كويس جدا في ناس كتير ذاكرت منه وجابت إمتيازات
  2. في ورق دكتور محمود لطفي .. كويس جدا
  3. وفي ورق دكتور ياسر وبرضو كويس جدا .. بس الفرق إنه أكتر من ضعف ورق دكتور لطفي - فيه كلام كتير زيادة بيستفيض أوي -

من الأخر دكتور لطفي لامم اليله ودكتور ياسر فارش ومطول .. ودي حاجه هتعود ليك في ناس بتحب العلم وناس بتحب الأنجاز




الدروس

  1. دكتور ياسر .. راجل لذيذ .. هو أكيد كويس جدا نظامه باين من ورقه المشكله إن الماده دي نظري بحت
  2. دكتور لطفي .. في الإنجاز .. مبفهمش منه غير لما يقلبنا .. بيتنرفز من الهزار والكلام والتأخير بس لذيذ وعليه قفشات في الحصه عسل

سواء ده أو ده إنت برضه اللي تقدر تحكم إنت بتستريح لأيه



طريقه المزاكره

المادة ممكن تبان صغيرة وسهلة بس لازم تتذاكر من أول السنة علشان بتزنق جامد اخر السنة و خصوصا السموم وأكتر ماده بتتأجل للسبب ده ..


الراوند

هو بيخلص في 40 يوم بتاخد في الأسبوع 3 مرات .. مرة POS و مرتين SKills

الرواند حلو ومفيد علشان الدكاترة بيشرحوا فيه كويس ممكن تحضره وكل يوم تذاكر الحتة النظري من المنهج ورا الحصة العملي اللي أخدتها في الراوند خلوا بالكو جدااا من الغياب واحرص تسال علي عدد الايام المسموح بيها للغياب لانهم صارمين جداا فالحوار ده وإتعمل مشاكل مع ناس كتير بسبب الغياب وكان فيه نقص درجات وفيه إعاده الامتحان فاحذروااا ..



شكرا لـ محمد السيد على كتابته

و شكرا لـ شيماء الجرف على التعديل والتحديث

و شكرا لـ كريم محمد على الصور

أدوات شخصية