سنة سادسة

من WikiBal6o

اذهب إلى: إبحار, بحث

محتويات

Introduction:

سنة سادسة تعتبر من السنين اللي دايما بتهمش في ذهن الطلاب يعني انت بتدخل الكلية تسمع أساطير عن خامسة و قصص رعب عن تالتة و ان رابعة سهلة ، محدش خالص بيكلمك عن سادسة و لا إيه موادها ولا أي حاجة كأنها مش موجودة رغم إنها من أكتر السنين درجات 1400 درجة زيها زي خامسة و موادها تقيلة ، دة راجع لأنها آخر سنة وبعدها الحرية –هأ... حلم جميل خيالي- و ثانيهم لأن الطالب في ستة خلاص جتته نحست و مبقاش يهمه

  • سادسة فيها مادتين – و بالطبع ضخمين- :
  1. الجراحة 900 درجة
  2. النسا و الولادة 500 درجة

جدول الدراسه للفرقه السادسه جديد 2011


موقع الكليه

http://mic.shams.edu.eg/moodle6/



النسا

نظام الراوند:

عبارة عن شهرين ، والدفعة بتتقسم مجموعات صغيرة على الوحدات ، كل يوم محاضرتين ، كل واحدة حوالي ساعة ونص او ساعتين ، بتبقى طبعاً في مستشفى النسا الحضور بيشددوا اوي فيه على لبس البالطو ، وتعليق كارنيهك عليه طول ما انتم جوه مستشفى النسا فيه بين المحاضرتين فسحة بتتراوح ما بين نص ساعة الى ساعة كل يوم بيجيبوا حالة يتاخد منها شيت واحيانا بيبقى فيه كشف واحيانا لأ ، واللي عايز يحضر عمليات وولادة ممكن يتفق مع النواب لأن كل وحدة ليها يوم عمليات ويوم طوارىء على ما أعتقد في الأسبوع بالنسبة للى هيبدؤا نسا فى الاول هتبقى مشكلة صغننة لان فى اخر الروند الامتحان بيبقى فيه مواضيع كتيرة


نظام الغياب :

الغياب بيتاخد مرتين في اليوم مره في session الأولاني و مره في session التاني عليه 20 درجه ليك 7 session تغيبهم يعني 3 أيام و نص من غير متنقص درجات بعدين تبدأ تنقص لحد لو نقصت أل 20 درجه ما بتدخلش امتحان الراوند وبتضطر تاخد راوند تاني بعد ما الراوندات كلها تخلص لمدة اسوعين تقريباً ولازم تحضر كل يوم وبيعملوا في آخره امتحان فيى الغالب بيبقى اصعب شوية بس في سنتنا كان عادي

clinical sheet of obst.&gyna

سي دي قسم النسا

Curriculum of 1st round

مكان الراوند :

وحدات النسا كلها جوه مستشفى النسا كل وحدتين فى دور من المستشفى

  • ارقام الوحدات :

الوحده الأولى : وحدة د/مراد السعيد

الوحده الثانيه : وحدة د /جمال وفا

الوحده الثالثه : وحدة د/احمد ابوجبل

الوحده الرابعه : وحدة د/محمد يحيي

الوحده الخامسه : وحدة د/شريف الطيطاني

الوحده السادسه : وحدة د/علي فريد


  • اماكن الوحدات :

وحدة د/احمد ابوجبل في الدورالرابع

وحدة د/جيهان علام في الدور الرابع

وحدة د/علي فريد في الدور الاول شمال والدور السادس يمين

وحدة د/خالد الهضيبي في الدور الاول يمين والدور السادس شمال

وحدة د/جمال وفا في الدور الرابع يمين

وحده د/محمد يحيي في الدور الخامس

تقسيمه درجات النسا:

المادة ب 500 50 درجة روند منهم 30 درجة امتحان(15 درجة سلايدز و15 درجة كيسيز 3 حالات واحدة بتاخد هيستورى من عيانة وحالتين مكتوبين بتعمل ليهم انفستيجيشنز وتريتمنت) ال 20 درجة بتوع الغياب :عندك اليوم بيبقى فيه 2 سيشنز.بعد عدد سيشنات معينة غياب تقريبا 7 سيشنز بيبتدو ينقصو درجات لحد 20 سيشن بيبقى فيه حرمان من الامتحان بس بيتعمل ليهم روند خاص فى شهر 7 وبيتخصم منهم 20 درجة) 50 درجة اعمال سنة ام سى كيو فى شهر 8 غالبا بيبقى من كتاب ام سى كيو القسم اخر السنة امتحان نظرى دكتور احمد ابو الجبل رئيس القسم قال انه هيكون ب 120 درجة عبارة عن problem solvings, short notes, enumerateو100 درجة ام سى كيو و تيجي تمتحن العملي في يوم تاني : عملي حالة لونج ب 60و الشفوي ب 60 و امتحان شرايح كمان ب 60

المنهج:

المادة متقسمة لجزئين

الأول النسا أو ال GYNA ودة القسم اللي بيكلم عن الأمراض الخاصة بالمرأة زي النزيف و السرطانات و العقم و موانع الحمل و سن اليأس و البلوغ و التغيرات و الأناتومي الخاص بالreproductive system of a femal

الثاني و هو الولادة أو ال OBST و هو المتخصص بكل شيء متعلق بالمرأة الحامل من أول الحمل الطبيعي و التغيرات اللي فيه و بعدين اللإجهاض و نزيف أول الحمل و النزيف في أثناء الولادة و الأمراض زي ال PET و ال DM و كدة و بعدين المشاكل في العيل و هو في الرحم زي ال Macrosomia و ال Preterm و ال post term baby و هكذا حتى تصل لكيفية الولادة و التكنيكات المختلفة اللي لازم تحفظها عشان مهمة جدا في الولادة العادية و الولادة المتعسرة و أوضاع الجنين المختلفة

بصراحة المادة رخمة جزء النسا ممتع فعلا و رائع و منطقي بس المشكلة الحقيقية في جزء الولادة الغير طبيعي و عموما مادة النسا بتتمتع بخاصية فريدة انك مهما حفظت الصفحة هتنساها يعني هتنساها مفيش أمل و ده حصل لكل الناس و دي حاجة معروفة فالحل الوحيد انك تحاول تلاقي علاقات بين الأجزاء المختلفة و تحاول تحط منطقية مع المنهج و بعضه زي ما هنقول بعد شوية في المذاكرة


الدروس :

د/محمد عبد الحميد

د/مندوه

د/السكري

د/محمد عبد العليم

د/حشاد

الفيز كالتالى :

النسا 1600 جنيه الفيز موحد .


  • د/محمد عبد الحميد

استاذ دكتور في الكلية عندناكان مسافر ولسه راجع من سنتين ، شاطر جدا ومتمكن من ماده النسا ، شرحه ممتاز جدا ، طريقة شرحة بتعتمد على التفاعل ما بينه وبين الطلبة ، بيكلمهم وبيردوا عليه في الدرس ، اكتيف جدا اثناء الشرح ، بيتحرك ويشرح ويرسم على السبورة ، بيحرص انك تخرج من الحصة فاهم كويس وحافظ كمان ، واستحاله تعرف تسرح في الحصه منه ، بيحب يعمل امتحانات في الدرس كل ما يخلص جزئية علشان يدرب الطلبة بتوعه ، بيلم كل موضوع في نقط وده بيسهل جدا المذاكرة في البيت ، كان في ناس بتشتكي من النسا انها بتتنسي وبتوه بس انا محستش بالمشكلة دي اطلاقا بسبب طريقة شرح الدكتور دكتور محمد كان في لجنة تطوير الكتب بتاعة النسا ، فورقه متاخد من نفس مصدر كتاب القسم بس متنظم بطريقه تسهل الحفظ والمذاكرة ، ميزته ان مفيش حاجة في كتاب القسم خارجة عنه ، يعني استحاله امتحان يضرب ورقه زي ما حصل في الدكاترة التانين


  • د/السكري

الدكتور السكرى تلميذ من تلامذة الدكتور ياسر, فواخد منه كتير قوي, سواء فى طريقة شرحه و طريقة تحفيظه للناس و برده من اول حصة تحفيظ للwritten زيه زي د. ياسر,بيدى المفيد الوافى من غير لف و لا دوران ولا تطويل ملوش لازمه, و رسومات و سكيمات و مش بيتأخر على الطلبه و لا بيبخل عليهم بوقت او مجهود, انت ممكن تقولى انت عرفت منيين طالما مخدتش معاه؟؟ أقولك, عمرك شوفت دكتور بيدى دروس, بينزل الساعه 7 الصبح يدى مراجعات free فى الكليه؟؟؟ اهو د. سكرى عمل كده, كان بيدى مراجعات free لكل الناس فى الكليه قبل امتحان الروند و كان كل الناس بتحضر حتى الى كانوا بياخدوا مع دكاتره تانيين, و تقريبا فى المراجعات دى شرح المنهج كله و ناس كتير كان بيصحوله مخصوص, ده غير ان مراجعات الروند بتاعت ال slides الى كان بيعملها قبل الامتحان كان بيجى منها, و اخر السنه برده كانت المراجعات تحفه و حل essay و اسئله direct و indirect و cases و كمان الدكتور بيعمل حاجه اسمها مراجعه الأوائل بيلم فيها المنهج فى 7 حصص من غير كروته

مراجعات دكتور سكرى فى النسا 2009 متجدد ان شاء الله


  • د/مندوه

دكتور سنه صغير بس شرحه كويس كان في ناس مخوفاني انه بيطول في الشرح و انه بيقعد ساعتين عشان يشرح 2 أو 3 صفحات لغاية ما بدأت اسمعه الراجل ما بيقولش كلام فاضي خالص كل كلمة مقصودة و كل كلمة ليها وزن هتعرف أهميته بعد كدة ممتاز جدا في انه يربط المنهح في بعضه بصراحة خلى لي المنهج وكأنه وحدة واحدة مش مواضيع كله في بعضه و ليه اسلوب حلو اوي انه يحسسك ان المنهج دة سهل بس عاوز واحد يعرف يذاكر ازاي و هو عارف ازاي و هيقولك المشكلة الأساسية عند الناس اللي كانوا بيحضروا له انهم كانوا بيقولوا انه بطيييييء في الكلام و كانوا بيناموا و في ناس مكنتش معجبه بحركاته أثناء الشرح بالنسبة لي انا كنت باسمع على سرعة 1.4 فكان سريع في الكلام وممتاز و خلاني اعرف ازاي افهم المادة بس في مشكلة طريقة شرحه مش كل الناس بتعرف تستخلص منها المعلومة في صورة نقط فبيحسوا بالتوهان وده خلى ناس كتيرة كانت عايزه تسيبه في اخر السنة تسجيلات دكتور مندوه نسا 2007

مراجعة دكتور مندوه



  • د/حشاد

دكتور حشاد توقف العام الماضي عن اعطاء الدروس

مراجعة نسا د.أحمد حشاد 2008

الكتب:

  • كتب القسم و د/حشاد ناقل كتاب القسم بالظبط فهما الاتنين واحد
  • كتب د/محمد عبد الحميد
  • كتب د/مندوه
  • كتب د/السكري

كل دكاترة الدروس منزلين كتب summary علشان تسهل الحفظ لامتحانات الwrettin



الجراحة

تقسيمه درجات الجراحه:

الجراحة ب 900 درجة التقسيمة كالتالي

اعمال السنة :

عليها 180 درجة 30 درجة روند و140 درجة امتحان ام سى كيو فى شهر 7 و 10 درجات اسبشيلات(الجراحة اسهل بكتير على فكرة من الباطنة)

بالنسبة لل30 درجة بتوع الروند :

5 درجات على بريزينتيشن تعملوها.5 درجات على اللوج بوك (كراسة بتشتروها من السكرتارية وتخلو الدكاترة فى الروند يمضو عليها.)وامتحان فى اخر الروند على حالة او حالتين فى كل الروندات محدش بينقص عن 26 او 27 من 30 ما عدا وحدة 6أ بتاعة د رضا عبد التواب وحدة صعبة وامتحانها مش حلو ودرجاتها زى الزفت .اللى هيخش الوحدة دى يحاول يحضر محاضرات دكتر رضا عبد التواب ويحضر معاه عمليات عشان يقفل ال 30 درجة. وحدة 5أ الغياب فيها صعب جدا وفيها حرمان من الامتحان.غير الوحدتين دول الحياة بيييييييييس

السبيشيلات الغياب فيهم مش هم اوى.يمكن العضم شوية بياخدو فيه الغياب.السبشيالات اللى هى عضم ومسالك ونيورو وتجميل.وفى الاخر بيبقى فيه امتحان ب 5 درجات للتجميل و5 درجات للعضم.والدكتر ياسر بيعمل مراجعة ليهم بتبقى جامدة اوى

امتحان اخر السنة:

إمتحان التحريري في آخر السنة ب 200 درجة و إمتحان إم سي كيو ب 180 درجة في يوم تاني و خد بالك إمتحان ال إم سي كيو ده 60 واحدة تختار إختيار واحد عادي يعني زي أي إم سي كيو و 60 واحدة إم سي كيو كل واحدة 4 إختيارات و تقول على كل اختيار صح ولا غلط و الجملة بنص يعني 0.5*4 ب 2 و 2*60 ب 120 و كدة كل ال 180 و إمتحان التشريح إم سي كيو ب 60 درجة إمتحان إم سي كيو عادي و بعدين تدخل امتحان شفوي مناقشة العمليات operative و ب 30 درجة و في نفس اليوم إمتحان الشرايحslides 18 شريحة الواحدة ب 5 درجات يعني كله 90 درجة الامتحان ده إم سي كيو بس مش spotting يعني يجيبلك الصورة و يسألك سؤال عليها مش هي إيه و بعد كدة تيجي تمتحن في يوم واحد حالة اللونج و حالتين شورت اللونج ب80 و الشورت الواحدة ب 40 يعني كله 160 درجة


المنهج:

المادة بتنقسم لقسمين جراحة عامة و هو الجزء الأكبر و بيتكون من Thyroid Breast Testis Hernia General topics و دي بتضم ال shock و ال tongue و ال salivary glands و ال infections و حاجات تانية صغيرة vascular

و أكبر branch هتشوفه في حياتك و هو ال GIT العظيم

و الجزء اتاني من الجراحة و هو ال special و هو عبارة عن Renal Bone Plastic Neuro Cardio الجزء بتاع الجراحة العامة هو اللي بينزل عملي و هو اللي ليه امتحان راوند أما الجزء ال special فمفيش غير التجميل ب5 درجات و بيكون سهل جدا ملاحظة السنة دي نزلوا في امتحان اخر السنة العملي لأول مرة بعض حالات ال special بس ما تخافوش هي بتبقى الshort و مش كتير بس بيكملوا خانة أما بالنسبة للسبيشيالات فهم ال main bulk بتاع ال mcq و ال written بتوع اخر السنة عموما مادة الجراحة مادة مش كبيرة أوي و أصغر بمراحل من الباطنة و تتلم فالموضوع إن شاء الله كويس و مفهوش قلق بس أهم حاجة فعلا هو انك تبدأ بدري السنة قصيرة فعلا و هتجري منك في ثواني و الله الواحد محسش بالسنة دي بالذات


الدروس :

في تلات دكاترة بيدوها

د/هاني رفيق

د/ياسر

د/مطري


الفيز كالتالى :

الجراحة:2000 جنيه . الفيز موحد دكتر ياسر ودكتر مطرى ودكتر هانى 2000 جنيه

  • د/هانى رفيق


دكتور هاني دكتور ذوق جدا ، ولذيذ في الدرس وبيصاحب كل الناس اللي معاه الدرس عنده كله فايده وشرح ، مش بيضيع وقت الحصة ولا وقت الطالب ، بيشرح بأسلوب ظريف بسيط واهم حاجة سريع

فيه ميزه في د هاني مش موجوده في اي دكتور تاني ، سواء جراحة او غيرها ، عنده نظام من اول السنة ، وخطة ، الخطة دي بتضمن من جانب الدكتور التزام وشرح المنهج ومراجعته مرتين ، ومن الطالب مجرد الحضور وانك تسمع كلام الدكتور لما يقولك ذاكر دي بس تذاكر دي بس ، عايزه اقول بجد مش هتحس بتعب او ملل او انتا واحدك علشان الدكتور بيخطط بحيث تبقى في اخر السنة متمكن جدا في الجراحة وقادر على مراجعتها اكتر من مرة بفهم وادراك عميقين بيخليك مش بس تحل امتحان النظري كويس كمان العملي والشفوي

الدكتر هانى رفيق اللى بياخدو معاه بيشكرو فيه جدا و مراجعاتينه الام سى كيو والنظري اللى قبل الامتحانات بتبقى رائعة.

اسلوب د هاني في الشرح حلو جدا ،طريقته واضحة و بيعتمد انك تفهم وتحفظ في الحصة ، بيبقى واخد باله من الطلبة كلهم في الحصه انهم يبقوا فاهمين ومركزين

ليه طريقة في الشرح ومتابعة الطلبة بتوعه بحيث يخلصوا منهج الدراسة ويحفظوه في نفس الوقت

ورقه شبه ورق الدروس بتاعت السنين الاولانية ، ومعمول على ورق مش كتب ، ودي ميزة ، والورق اللي مطبوع عليه مش بيلمع زي كتب د مطري ، والمعلومات اللي فيه مترتبة بشكل يسهل الحفظ والاسترجاع ، وكميتها مناسبة

من وجهة نظر ناس كتير افضل المصادر المتاحة ، لانه اسهل في المذاكرة والحفظ وبيلم المنهج

تسجيلات د.هاني رفيق جراحة 2010

تسجيلات مراجعة الجراحة النهائية - د هاني رفيق 2010


  • د/ياسر

هو الأقدم و هو الخبرة الأكبر بصراحة دكتور ممتاز و رهيب و ممكن تسيب نفسك معاه على الأخر من الدكاترة اللي بيحاول ما يطولش عليك في المواضيع يعني المهم يتشرح و اللي مش هم بيتشرح برضه بس بيقولك في الأخر ايه اللي هو مطلوب منك بالظبط مفيش تنفيض لحاجة أبدا شرح رائع من الدكاترة اللي دمهم خفيف جدا جدا جدا لدرجة إن حصصه كانت من الحصص اللي كنت باستناها المعلومات اللي فيها و أسلوب الهزار في النص و إزاي يقدر يدي مثلا نص ساعة دش و لما يحس إن الناس بدأت تتعب يروح قالب شوية هزار و يريح الحصة و يفوقنا و يرجع للشرح تاني ممتاز ممتاز ممتاز دة غير انه دكتور ابن بلد و مدقدق كدة و جامد فالحصة بتاعته ممكن اللي مبيحبش حتى يطول في الدروس هيقعد و يسمع و دي ميزة دكتور ياسر

تسجيلات د ياسر 2008 في الجراحة عين شمس (النظري والكلينكال والمراجعة)

مراجعة د/ياسر جراحة


  • د/مطري

رغم إنه يعتبر الأصغر بس بصراحة مش ممكن في الشرح أسلوب سلس بس كل حاجة هتتشرح تعامله مع المواضيع الكبيرة هو هو تعامله مع المواضيع الصغيرة كل حاجة بتتشرح بالظبط مقدرش أقول أي حاجة عنه غير إمتياز من الدكاترة اللي الحصة بتاعتهم ساعتين يعني ساعتين شرح سك قليل جدا لما الموضوع يتساب من إيده و دايما يعيد الموضوع أكتر من مرة لغاية ما يتاكد إن الموضوع وصل للناس كلها أنا مش قصدي ان الحصة بتاعته رخمة بس بالنسبة للناس اللي ما بيستحملوش كلام علمي كتير ورا بعضه الحصة بتيقى تقيلة فعلاو عاوزه واحد فايق جامد فالناس الشدة و اللي ما بيضايقوش من كدة دكتور مطري هو اختيارهم لأن في ناس كتير ما بتحبش الهزار في الحصة و عاوزة الحصة علم سك او بمعنى أصح ..فيه هزار بس مش كتير

محاضرات الجراحة للدكتور محمد المطري 2007

مراجعات د/ مطري 2009

الكتب:

  • ملازم د/هاني رفيق

ورق الدكتور ابيض في ملازم ، بالكمبيوتر طبعا ، كل ملزمه مكتوبه على هيئة اسكيمات ، يعني اول 5 صفحات بيبقى فيه نظام الشابتر ، وبقية الصفح بتمشي عليه

الدكتور عامل ملزمتين جينيرال كبار General 1 : Thyroid scrotum hernia

General 2: Breast Vasculararterial, Venous, lymphatics)

وفيه ملزمة summary general دي فيها كل الكلام اللي في الملزمتين الكبار باختصار + جزء مهم جدا مكتوب بطريقة حلوة جدا اللي هو Basic surgery وده فيه ال blood transfusion, infection, shock وحاجات تانية

فيه ملزمة special كبيره فيها ال neurosurgery, urosurgery , orthopedics , cardiosurgery. plastic surgery مفيش ملزمة سامري لل سبيشيالز علشان مهمين وعليهم تقريبا نص درجات الجراحة في كل الامتحانات

فيه 3 ملازم كبار GIT وفيه ملزمه عبقرية summary GIT فيها كل حاجة ممكن تحتاجها عن ال GIT سواء في امتحان نظري او ام سي كيو او احتى شفوي

فيه ملزمة للعملي واحلى حاجة ان الملزمة بتاعت العملي فيها بجانب العملي كل الكلام النظري اللي بيتسأل في امتحانات العملي ، والاناتومي كمان ، وده بيوفر الوقت في المراجعة قبل امتحان العملي

ملزمة operative متجيبوهاش في اول السنة جيبوها اخر السنة لما الدكتور يبدأ يشرحها


مميزات ورق د هاني رفيق 1- الاسلوب السهل الممتنع ، المذكرات سهلة جدا في القراية والفهم والحفظ ، طريقة كتابتها بتسهل على العين الحفظ ، وترتيب المعلومات فيها منطقي لمخك ، وده بيسهل جدا الاسترجاع وقت الامتحان 2- الكمية ، ورق د هاني كميته مناسبة بالضبط للامتحان ، هيخليك متغطي علميا في كل الامتحانات ومش هيرهقك بكميات كبيرة طول السنة، وانا بنصح الناس انها تذاكر من كتب السامري لان ده اللي هتلحق تكتبه في وقت الامتحان الضيق 3- المعلومات ، الدكتور مش ناقل من سورس معين وخلاص ، الدكتور قاري في كتب جراحة كتيرة وبعد كده كاتبها هو باسلوب جميل ، وكاتب فيها المعلومات اللي الدكاترة بيحبو يسمعوها في الامتحانات بالضبط ، بالاسلوب العلمي اللي بيحترموه 4- طريقة الاخراج ، فنيه ، بسيطة ، بتديك مساحة انك ترسم ، تضيف ، تلون + موضوع تسهيل الحفظ


فعلا ورق د هاني افضل مصدر مذاكرة مش هيرهقك طول السنة ، + هيديك كل اللي انتا محتاجه تماما في الامتحانات




  • كتب د/ياسر

د. ياسر عدل الكتب بتاعته الجديد فى الكتب:

1- طباعة و جوده اعلى من النسخ السابقة

2- ورق بجوده عاليه و الوان افضل

3-المحتوي updated من احدث ال text books

4- الكتاب يحتوي على المنهج المقرر و المعلومات الى مقرره على طلاب ال under graduate من غير اى زيادات او اضافات ملهاش لازمة, يعنى لا حتزود حاجة ولا حتشطب حاجة ولا حتلاقى كلام زيادة مش عليك و حشو على الفاضى

5-الكتاب يتضمن المعلومات و المحتوى الى موجود فى كتاب القصر العينى و ده للى ميعرفش ده الكتاب الى قسم الجراحة بيعتبره الكتاب الرسمى بتاعهم و بيصدقوا و يوافقوا على كل حاجه فيه

6-الكتب بشهادة الدفع السابقه تحتوى على المعلومات الى مطلوبة و اكثر من كافى و تعتبر من افضل الكتب لل under graduate




  • كتب د/ مطري

عبارة عن مراجع مصغرة رائعة فعلا تصلح انك تذاكر منها من غير حتى ما تكون بتاخد دروس اساسا بتشرح نفسها بصراحة ممتازة مشكلتها انها احيانا بيبقى فيها اكتر من اللازم و اكتر من اللي انت المفروض تعرفه بصراحة و دة تعبني في اخر السنة لأن الموضوع اللي كان صحابي بيذاكروه من كتب د/ياسر في 5 صفحات مثلا كنت انا باذاكره انا في 10


راوندات الجراحه الخاصه

راوند ال Neurosurgery

  • مكان الراوند

بعد لما تدخل من البوابة الرئيسية لللمستشفى من عند التمثال تمشى ف الطرقة بتاعة المستشفى هتلاقى على يمينك اول فتحة دى بتاعت سيكرتارية الجراحة سيبها وخش ف الفتحة اللى بعدها على اليمين فى الدور الارضى امشى شمال وخش المبنى نفسه خش يمين هتلاقى مكان الراوند على ايدك اليمين برضو

المكان كويس بس المشكلة انه مش بيستوعب كل الناس فياريت اللى غاوى علم وعاوز يهرب من الحر والكتمة يروح بدرى علشان يلحق كرسى الا اذا كان من هواة الوقوف او القعدة على الشيسلونج


  • اسماء الوحدات

هم اربع وحدات باين او خمسة بس مش فارقة حاجة انتوا بتاخدوا الراوند كله فى نفس المكان والدكاترة من الوحدات المختلفة بتلف عليكم


  • نظام الراوند

زى الجدول العام للكلية كل يوم 2 سيشن واحد من 9 ونص والتانى من الساعة 12 ماعدا يوم السبت والخميس سيشن واحد يوم السبت من 12 ونص ويوم الخميس من 9 ونص


  • الغياب

فى حاجتين:

اولا :ورقة كل دكتور بيمضى فيها بعد نهاية كل سيشن ونصيحة بلاش حد يحط ورقة حد احسن الدكاترة بيزعلوا جدا

ثانيا :فى ورقة بتكتب فيها اسمك مع السكرتيرة وهى بتكون موجودة الصبح قبل الراوند ولو مشيت عادى ممكن تطلع لها فوق وهتكتب اسمك عادى هى ست طيبة جدا بس المهم هو كتابة اسمك مع السكرتيرة ده الاهم


  • نظام الشرح

الدكاترة بيشرحوا كويس جدا جدا جدا وبجد هتستفيدوا اصلا ال 13 يوم كلهم بيدوروا حولين 14 موضوع هتلاقى على كل موضوع 2 سيشن واحد حالات(لو فى انتوا وحظكم) والتانى شرح نظرى وبجد فى ناس كتير كويسين وجامدين ف الشرح زى دكتور احمد غباشى ودكتور عصام عمارة وغيرهم وغيرهم


  • تذاكر منين؟؟؟

القسم منزل الورق اللى هينحط فى كتاب الجراحة لغاية الكتاب ما ينزل ودول حوالى 55 ورقة هاتوهم من السكرتارية اوصوروهم من اوسكار واقروهم وهم اقل بكتير من اللى ف كتب دكتور مطرى واللى عاوز يذاكر من كتب دكتور مطرى مفيش مشكلة حوالى 75 صفحة تقريبا


  • اسمع ميييين؟؟؟

اصلا طول الراوند هتلاقى نفسك سمعت شرح الراوند ودكتور مطرى هم كلهم 6 او 7 ساعات ودكتور ياسر كذلك يعنى ممكن تسمع الاتنين وشرح الراوند وكمان تسمع بتوع القصر العينى لو حابب زى ماقولت هم 12 او 13 موضوع بيلفوا حوليهم طول ال 13 يوم يعنى مش هتكون مشكلة خالص


  • نظام الامتحان

طبعا نظام السنة دى مفيش امتحانات غير فى نهاية ال 3 شهور بتوع الاسبشيالات فالمطلوب بس انك تسمع وتقرى كويس علشان الام سى كيو اللى ممكن يجيبوه ف نهاية ال 3 شهور بتوع الاسبشيالات


  • المواضيع اللى بتتشرح واللى ف كتاب القسم هى:

Intra cranial pressure Head injury Spine injury P.N injury and entrapments Hydrocephalus Spinal dysraphism Craniostenosis Lumbar disc disease Cervical disc disease Brain tumors Ischaemic C.V. stroke Hemorrhagic C.V stroke Brain abscess Functional neurosurgery


راوند المسالك البولية

  • مكان الراوند

تطلع الدور التالت ف مستشفى الجراحة وتتجه يمينا هتلاقى فى وشك عمليات المخ والاعصاب والمسالك خش ف الباب اللى على شمالك هتلاقى الدنيا بقت رخام ونضافة بقى غير مستشفى الدمرداش اللى نعرفه ابتسم انت ف قسم المسالك وقاعة الدرس قدام ف الطرقة دى على يمينك

  • الغياب

مفيش امضاءات ولا فى لوج بوك ولا بتاع السكرتيرة معاها دفتر كده وبتعلم فيه على الاسماء زى ايام راوند الاطفال وفى ايام بيكتبوا الاسماء ف ورقة و ف الحالة دى لازم تتاكد ان السكرتيرة علمت على اسمك ف الدفتر لانه غالبا الورقة بتضيع او بتترمى او بتروح تانى يوم تلاقيها مكانها


  • نظام الشرح والراوند بصفة عامة


والله المشكلة الكبرى ان الدكتور اللى بشرح ف اليوم ده بيكون يوم عملياته يعنى بيكون نازل م العمليات مباشرة انت وحظك بقى ينزل على الساعة 10 مثلا او 11 وممكن 12 الا ربع انتو وظروفكم لكن المعروف انهم عمرهم ما ابتدوا قبل الساعة 10 ابدااااااااااااااااا وغالبا بيكون سيشن واحد حتى لو موضوعين الدكتور نفسه بيخلهم سريعا يعنى هتطلعوا بدرى بس ده طبعا يعتمد على الدكتور دخل امتى اصلا

علشان كده خلى نفسك طويل بلاش تزهق وتمشى بسرعة لو الدكتور اتاخر

كمان متنسوش ف مكان الراوند فى دولاب كده كنت فاكرة مكتبة طلع فيه جارات زى بتاعت ايام الباثولوجى بصوا عليه برضو يقال والله اعلم ممكن ينزل ف الامتحان هو عموما مش حاجات اعجاز يعنى كلها حصوات واورام ف الكلى وكده يعنى ...الخ


من الملاحظ برضو ان تسجيلات دكتور المطرى ودكتور ياسر مش كبيرة على الاطلاق ف السبشيالات بصفة عامة يعنى برضو ممكن تسمع الاتنين طول مدة الراوند لو كل يوم حصة مثلا


  • المواضيع اللى بتتشرح


هتلاقيها متعلقة ف ورقة ف الطرقة على شمالك وانت داخل مكان الراوند وهى المواضيع الاتية:

Urological signs and symptoms and physical examination Hypospadius--Extrophy--UDT Imaging Catheter-Instruments Voiding dysfunction (retention –incontinence) BPH--Cancer prostate Scrotal and testicular disorders Renal masses Pediatric Urology D.D of hematuria and Loin pain Urinary Lithiasis Cancer Bladder




راوند التجميل

  • مكان الراوند

فى مدرج الفلاح كل يوم ف قاعة شكل على حسب اللى فاضى وغالبا بيكونوا كاتبين ورقة ع القاعة اللى فيها الدرس علشان لو متأخر يعنى متدورش كتير


  • نظام الراوند

برضو كل يوم سيشن واحد غالبا ولو الموضوع طويل الدكتور بيدى ريست ف النص وبيكمل وعمر الراوند ماطول عن 12 او 12 ونص باى حال من الاحوال


  • الغياب

فى ورقة بتلف وتكتبوا السامى والنايب بياخد الورقة ف الاخر وما اسهل ان تكتب اسم اللى انت عاوزة ف الورقة بس الله اعلم بقى النايب يراجع تانى ولا لا انتو وحظكم ومفيش امضاءات ولا لوج بوك ولا دفتر زى المسالك هو الورقة اللى مع النايب وخلاص

  • نظام الراوند

والله الدكاترة بيشرحوا كويس جدا وخصوصا فى كام موضوع كدة يفضل تحضروهم علشان التخيل والرسومات زى ال flap and graft وكمان لان الامتحان بتاع نهاية الراوند ممكن يكون فيه من السليدات دى كتير

وعموما اللى يروح هيستفاد لانه فعلا الناس بتشرح كويس ف الاغلبية وكمان السليدات اللى ممكن تيجى ف الامتحان


  • الموضوع اللى بتتشرح ف الراوند هى :

وهو الموضوع الاكثر اهمية على الاطلااااااق BURN

, وهو تانى اهم موضوع ف الراوند كله Tumors of the skin Cleft palate and cleft lip Hypospadius and Ectopia vesica Swellings of the Jaw Maxillofacial trauma Ulcers of the leg Hand injuries Hemangiomas and vascular abnormalities Skin Grafts and Flaps Types of sutures…etc


للاسف مفيش مواضيع شد الوجة ولا Breast augmentation or reduction متفتكروش شغل السوق ده هناك المواضيع اللى فوق بس هى اللى بتتتاخد ف الراوند



راوند العظام

  • نظام الراوند ومكانه

فى جدول متعلق فى الطرقة بتاعة قسم 2 عظام ف الدور الارضى لمستشفى الدمرداش على شمالك وانت داخل من ناحية التمثال بتاع الدمرداش باشا هتلاقوا فيه الراوند متقسم جزئين بالتبادل مع بعض كل جزء بيقضى اسبوع محاضرات واسبوع تانى لف

اولا اسبوع المحاضرات وكانها سيشنز عادية من اللى نعرفها وغالبا بتصفى على ساعة ولا اتنين على الاكثر مكانه جنب عيادة العظام نفس الطرقة اللى كنا بناخد فيها جلدية السنة اللى فاتت الطرقة مقسومة بسور حديد كده يمينك جلدية وشمالك عيادات العظام والجبس وااخرها المكان اللى بناخد فيه الراوند

ثانيا الاسبوع التانى اللى بتلف فيه وهو كالاتى:

يوم بتقضيه ف العيادات الخارجية اللى هو على شمالك وانت رايح مكان المحاضرات وده المفروض انك بتقعد فيه جنب الدكتور ف العيادة يوريك الاشعة وتعمل اكسمينيشن على الناس اللى جاية تكشف وكده لكن غالبا الناس بتمضى من الدكتور وخلاص وتتكل على الله

اليوم التانى المفروض ف استقبال العظام واوضة العظام اول ما تدخل استقبال الجراحة هتلاقيها على يمينك وغالبا النايب مجرد ما توريه اللوج بوك بيمضيلك وتتكل على الله لكن لو حبيت تقف وتشوف الناس محترمين جدا وبيعلموا كويس هتقف وتشوف وممكن تمد ايديك كمان لو حبيت

اليوم التالت متحف الاشعة وده موجود ف مدرج الفلاح اول ما تدخل هتلاقيه ف وشك على طول تنعطف يمينا هتلاقى لوحة مفاتيح كهربا شغلها كلها هتلاقى فوانيس الاشعة نورت بخ اشعة كتتتتتتتتتتتتتتتتير اورام وكسور وكل ما تشتهيه الانفس وتلذ الاعين ف عظام البنى ادمين والمفروض برضو ان فى دكتور معاك بيشرح لك الموضوع وتسأله ويمضى لك ف اللوج بوك لكن للاسف غالبا مبيكونش موجود او بييجى متاخر


اليوم الرابع واليوم الخامس دول مقابلة مع استاذ فى قسم العظام حاجة زى سيمينار كده المفروض ان الدكتور بيناقشك او بتتكلموا او بيشرحلك موضع مثلا How to deal with fracture ?/ بس برضو للاسف الدكتور بييجى متأخر ساعات او بيكون موجود بس مش ف القسم والناس تدور وتمشى او متجيش من الاساس وده بيزعل الاساتذة دايما واظن الموضوع هيشد ف الحتة دى ف الراوند الجاى لان رئيس القسم كان زعلان من كده جدا على ايامنا المهم انه بعد ده كله بيمضى لك ف اللوج بوك وتتكل على الله


  • الغياب

فى حاجتين مهمين

اولا --ودى الحاجة اللى ناس كتير متعرفهاش -- انه فى غياب غير اللوج بوك وده مع السكرتيرة ف العيادة اللى لسه قايل مكانها فوق بتعلم صح قصاد اسمك فى كشف معاها ولازم تروح تاخد الغياب ايا كان يومك عيادة –استقبال—محاضرات-- سيمينار لازم تروح تاخدة مع السكرتيرة ف العيادة

ثانيا اللوج بوك طبعا بعد كل يوم تحضره تخلى الدكتور او النايب او ف العيادة يمضوا لك بس هنا بقى فى حته مهمة جدا خصوصا اليوم اللى بتقابل فيه استاذ ف القسم غالبا الدكتور مش موجود واحنا مستنيين كتير ونتفق اننا نمشى كلنا ونمشى فعلا وفجاة تانى يوم تلاقى واحد الدكتور ماضى له ف اللوج بوك وكانه قابل الدكتور بالصدفة وطبعا الدكتور ساعتها زعل جدا واتصل برئيس القسم ان مفيش غير طالب واحد اللى جه وانا هنا من بدرى والطلبة مبتجيش بالظبط زى ايام ابتدائى كلنا نهرب من سور المدرسة وفجاة مجموعة من الخونة يلفوا ويدخلوا من باب المدرسة خلاصة القول متتحركش غير لما الدكتور يمضى لك لان لو الدكتور جه بعد المعاد ب 9 ساعات ولقا واحد بس ومضا له بالسلامة انت كده غياب وبصراحة امضاءات الدكاترة فورما وصعبة يعنى مش هتعرف تقلدها

فى ناس كانت لما الدكتور ميجيش تروح للنواب وتخليهم يمضوا لهم شغال برضو عادى المهم حد يمضى وساعات دكتور يقولنا امضوا انتوا


  • نظام الشرح والموضوعات اللى بتتشرح

الناس اللى بتيجى بتشرح كويس صراحة وهتستفاد كتير من الحضور لو المحاضرين جم والمواضيع اللى بتتشرح فى اسبوع المحاضرات هى

How to deal with fracture Neck and trunk Hip region Knee region Hand-wrist-elboe-shoulder Bone tumors Orthopedic problem in children




نظام امتحان الاسبشيالات

فى يوم ما بتتجمعوا قدام وحدة الفلاح الساعة 8 الصبح وتمضوا مع النايب هناك وتستنوا بيدخلوا تلاتينات كده كل 30 طالب فى مدرج من المدرجات ومحدش يفتكر ان اللى يخش بدرى هيروح بدرى عادى يعنى خليك هادى خالص لان اللى يخلص بدرى هيتحبس جوة لغاية ما ااخر طالب يخلص

المهم الامتحان 40 سلايد كل برانش من الاسبشيالات 10 سليدات زمن كل واحدة 45 ثانية ومفيش دكتور بيقول شفت ولا حاجة خالص هى بتقلب لوحدها فخد قرار واتكل على الله بسرعة علشان متتلخبطش وحظك بقى ياعم لو الكمبيوتر هنج على سلايد صعبة هههههههه بس ده طبعا نادر زى احتمال انك تلاقى الف جنيه واقعة من واحد ف الشارع وبعد ماتخلصوا ال 40 سلايد بتسلموا ورق الاجابة وهو زى ورق ام سى كيو بتاع ااخر السنة بقلم رصاص وتظليل دواير وتسلموا كمان اللوج بوك وورقة غياب النيورو وتنتظروا بقى جوة ف القاعات المهجورة من مدرج الفلاح لغاية ما الناس تخلص وبعدين افراج



راوند الجراحه العامه

ليها قسمين كبار جراحة عامة و ده الرواند بتاعه شهرين


بالنسبة لموضوع الغياب في راوند الجراحة العامة في فعلا غياب بس مش بيشدوا عليه اوى

في راوند الجراحة العامة بتتقسموا على الوحدات اللي في مستشفى الجراحة و في الوحدة نفسها بتتقسموا لمجموعات من أربعة كل مجموعة ليها يوم عشان تاخد ال history من العيان بتاع اليوم ده و تحضر ال case للدكتور و بتبقوا عارفين الحالة من أول الراوند لأن في جدول بيحدد ايه اللي هتشوفه

اليوم العادي في راوند الجراحة العامة ماشي بالطريقة دي :

في الأول من 9.30 ل 11.30 الدكتور هيناقش معاكوا الحالة و هتعملوا الفحص

من 12 ل 2 هتروحوا لمدرج الفلاح عشان في محاضرة لكل راوند مع نفسه

عموما بالنسبة للجراحة راوند الجراحة العامة مهم جدا فعلا و مفيد بغض النظر عن الغياب ,

اسطوانه الجراحة 2008 طب عين شمس

أدوات شخصية